Azərbaycan ilə Türkiyə arasındakı münasibətlərin keyfiyyətcə yeni mərhələyə – müttəfiqlik səviyyəsinə yüksəldilməsi qardaş ölkələrimiz arasında tarixi, mədəni və mənəvi bağlılıqlar əsasında formalaşmış əməkdaşlığın dərinləşdirilməsi baxımından mühüm hadisədir.
Bu sözləri AZƏRTAC-a açıqlamasında Milli Məclisin Gənclər və idman komitəsinin sədri Şahin İsmayılov bildirib.
“Prezident İlham Əliyevin müdrik rəhbərliyi ilə Vətən müharibəsində qazanılan parlaq Zəfər regionda yeni reallıqlar yaratdı. Bütün dünya Azərbaycanın gücünün, qüdrətinin şahidi oldu. Eyni zamanda, Vətən müharibəsinin ilk günündən qardaş Türkiyənin Azərbaycana siyasi və mənəvi dəstəyi xalqlarımız arasındakı sarsılmaz birliyin göstəricisi idi”, – deyə komitə sədri vurğulayıb.
Şahin İsmayılov qeyd edib ki, Qars müqaviləsindən 100 il sonra – 2021-ci il iyunun 15-də Azərbaycanın mədəniyyət paytaxtında imzalanan Şuşa Bəyannaməsi qardaş ölkələrimizin, xalqlarımızın maraq və mənafelərinə xidmət edir. Siyasi, beynəlxalq müstəvidə birgə əməkdaşlıq, iqtisadiyyat, enerji təhlükəsizliyi, nəqliyyat, mədəniyyət, təhsil, ordu quruculuğu və digər strateji sahələri əhatə edən sənəd ölkələrimizin bütün bu istiqamətlər üzrə ortaq maraqlarının qorunmasında vahid mövqeyini nümayiş etdirir.
Ölkələrimiz arasındakı münasibətlərin davamlı inkişafını təmin edən Bəyannamənin, həmçinin regional və beynəlxalq təhlükəsizlik mühitinin möhkəmləndirilməsi baxımından mühüm əhəmiyyət daşıdığını söyləyən Ş.İsmayılov deyib: “Şuşa Bəyannaməsinin imzalanması Azərbaycanın və Türkiyənin regionda sülhün, sabitliyin və qarşılıqlı hörmət prinsiplərinə əsaslanan yeni təhlükəsizlik arxitekturasının formalaşmasında fəal rol oynadıqlarını göstərdi. Təhlükəsizlik və müdafiə məsələləri ilə bağlı sənəddə əksini tapan ortaq müdafiə mexanizmləri ölkələrimizin suverenliyi və milli maraqlarının etibarlı şəkildə qorunmasına xidmət edir. Bu, təbii ki, Ermənistandakı revanşist qüvvələrə açıq mesaj olmalıdır”.
Ölkələrimizin Türk dünyasının birlik və rifahına xidmət edən önəmli səylər göstərdiklərini vurğulayan komitə sədri müttəfiqlik səviyyəsində qurulan Azərbaycan–Türkiyə münasibətlərinin Türk dünyası ölkələrinin həmrəyliyinin gücləndirilməsi, əməkdaşlıq əlaqələrinin genişləndirilməsi baxımından əhəmiyyətini vurğulayıb. Azərbaycan ilə Türkiyə arasında formalaşan müttəfiqlik modeli Türk dünyasının beynəlxalq aləmdə vahid mövqe ilə çıxış etməsi, ortaq maraqların qorunması və daha güclü geosiyasi aktora çevrilməsi baxımından nümunəvi təcrübədir.
Bəyannamənin qardaş ölkələr arasında münasibətlərin gələcəyinin müəyyənləşdirilməsi baxımından önəmini qeyd edən Şahin İsmayılov bildirib: “Şuşa Bəyannaməsi Azərbaycan-Türkiyə əlaqələrinin uzunmüddətli perspektivdə daha da dərinləşməsinə, eləcə də regional əməkdaşlıq mühitinin formalaşmasına mühüm töhfə verir”.
