Prezident, Müzəffər Ali Baş Komandan İlham Əliyevin rəhbərliyi ilə Vətən müharibəsinin hər bir günündə qazanılan tarixi qələbələr ölkəmizin hərbi-siyasi qüdrətini, xalqımızın milli birliyini və öz torpaqlarına sahib çıxmaq əzmini bütün dünyaya nümayiş etdirdi. 2020-ci il oktyabrın 17-də Füzuli şəhərinin işğaldan azad edilməsi Vətən müharibəsinin mühüm zəfərlərindəndir.
Füzulinin azad edilməsi uğrunda aparılan döyüşlər Azərbaycan Ordusunun yüksək peşəkarlığını, döyüş qabiliyyətini və şəxsi heyətin qəhrəmanlığını nümayiş etdirdi. Ermənistan silahlı qüvvələri təxminən otuz il ərzində bu istiqamətdə çoxpilləli müdafiə xətləri, mürəkkəb mühəndis-istehkam qurğuları və möhkəmləndirilmiş mövqelər yaratmışdı. Lakin Azərbaycan Silahlı Qüvvələri düşmənin uzun illər ərzində qurduğu müdafiə sistemini yararaq strateji yüksəkliklərə nəzarəti ələ keçirdi. Füzuli istiqamətində əldə edilən hərbi uğurlar sonrakı əməliyyatların inkişafına, xüsusilə işğal altında olan digər torpaqlarımızın azad olunmasına mühüm imkanlar yaratdı.
Füzulinin azad edilməsindən sonra üzə çıxan mənzərə Ermənistanın işğal dövründə Azərbaycan torpaqlarında törətdiyi dağıntıların miqyasını bütün aydınlığı ilə göstərdi. Füzuli şəhəri də işğal illərində demək olar ki, tamamilə dağıdılmışdı. Yaşayış binaları, sosial obyektlər, mühəndis-kommunikasiya infrastrukturu məhv edilmişdi, xalqımıza məxsus tarixi və mədəni irs nümunələrinə ciddi ziyan vurulmuşdu.
Dövlətimizin başçısının dəfələrlə qeyd etdiyi kimi, Füzuli azad olunanda hərbçilərimiz Bayrağımızı ucaltmaq üçün bir salamat bina tapa bilmirdi, yalnız bir hərbi hissə istisna olmaqla. Bu fikir dağıntıların miqyasını, işğal dövründə şəhərin hansı vəziyyətə salındığını aydın şəkildə göstərir.
Zəfərdən sonra qarşıda daha mürəkkəb və uzunmüddətli vəzifə – dağıdılmış ərazilərin bərpası, müasir yaşayış infrastrukturunun yaradılması və keçmiş məcburi köçkünlərin doğma yurdlarına qayıdışının təmin edilməsi dayanırdı. Prezident İlham Əliyevin rəhbərliyi ilə həyata keçirilən genişmiqyaslı bərpa-quruculuq işləri və tarixi torpaqlarımızda dayanıqlı sosial-iqtisadi inkişafın təmin olunması Azərbaycan dövlətinin qüdrətinin əyani təzahürüdür.
Müasir şəhərsalma prinsiplərinin tətbiqi ilə yenidən qurulan Füzuliyə artıq həyat qayıdıb. Yüksək zövqlə tikilən yaşayış kompleksləri, təhsil müəssisələri, səhiyyə və digər sosial obyektlər insanların rahat yaşayışının təmin edilməsinə yönəlib. Bununla yanaşı, elektrik enerjisi təchizatı, rəqəmsal idarəetmə, su təsərrüfatı və digər kommunal xidmətlər sahəsində yaradılan infrastruktur şəhərin müasir yaşayış və iqtisadi fəaliyyət mərkəzi kimi formalaşmasına xidmət edir.
Digər tərəfdən Füzuli Beynəlxalq Hava Limanının istifadəyə verilməsi, Zəfər yolunun, Füzuli–Hadrut və Əhmədbəyli–Füzuli–Şuşa avtomobil yollarının inşası bütövlükdə bölgənin nəqliyyat bağlantılarının əhəmiyyətli dərəcədə genişləndirilməsini təmin edir.
Keçmiş məcburi köçkünlərin doğma torpaqlarına qayıtması, burada uzunmüddətli, təhlükəsiz və firavan həyat qurmaları dövlətimizin qarşısında duran əsas vəzifələrdəndir. Məhz görülən işlərin nəticəsidir ki, bu gün Füzuli şəhərinə 827 ailə, ümumilikdə 3153 nəfər köçürülüb. Artıq onlar doğma şəhərlərinin gününü ata-baba yurdlarında böyük coşqu və qürurla qeyd edirlər.
Şahin İsmayılov
Milli Məclisin Gənclər və idman komitəsinin sədri
