“Azərbaycan hər zaman sülhsevər siyasət yürüdən, regionda sabitlik və əməkdaşlığın tərəfdarı olan bir dövlətdir. Dövlətimizin xarici siyasətinin əsas prioritetlərindən biri qonşu ölkələrlə mehriban qonşuluq münasibətlərinin qurulması və bölgədə davamlı sülhün təmin edilməsidir. Bunun bariz nümunəsi kimi 30 ildən artıq davam edən Ermənistan–Azərbaycan münaqişəsinin nəticəsində əldə olunan yeni reallıqları göstərmək olar”.
Bunu “Ölkə.az”a açıqlamasında Milli Məclisin deputatı Şahin İsmayılov deyib.
Onun sözlərinə görə, İkinci Qarabağ savaşından sonra regionda sülh gündəliyinin müəyyənləşdirib buna imza atan Azərbaycan bölgədə sabitliyin təmin olunması üçün qətiyyətli addımlar atıb. “Bakı dəfələrlə bəyan edib ki, regionda davamlı sülhün qurulması bütün dövlətlərin maraqlarına xidmət edir”,-o vurğulayıb.
Deputat təəssüflə qeyd edib ki, bəzi hallarda qonşu dövlətlərin Azərbaycana qarşı dostluq və qonşuluq prinsiplərinə uyğun gəlməyən addımlarının şahidi oluruq: “İran tərəfindən Naxçıvan istiqamətində pilotsuz uçuş aparatları ilə həyata keçirilən hücum da bu cür təxribat xarakterli hərəkətlərdən biridir.
Naxçıvan ərazisinə pilotsuz uçuş aparatları ilə atəşə tutulması Azərbaycan dövlətinə qarşı açıq təcavüz və terror aktı kimi qiymətləndiririk. Hücum zamanı mülki obyektlərini, xüsusilə Naxçıvan Beynəlxalq Hava Limanının binasının, məktəbin və digər infrastrukturların hədəfə alınması bu aktın nə qədər təhlükəli və qəbuledilməz olduğunu bir daha göstərir.
Azərbaycan dövləti bu çirkin terror aktını qətiyyətlə pisləyir və məsul şəxslərin dərhal cəzalandırılmasını tələb edirik. İran tərəfi bu hadisə ilə bağlı rəsmi izahat verməli, Azərbaycan dövlətindən üzr istəməli və hadisənin təşkilində iştirak edən şəxsləri cinayət məsuliyyətinə cəlb etməlidir.
Bu, İranın Azərbaycana qarşı ilk təxribatı deyil. Hamımız yaxşı xatırlayırıq ki, bir müddət əvvəl Azərbaycanın Tehrandakı səfirliyinə silahlı hücuma məruz qalmışdı. Həmin terror aktı nəticəsində bir Azərbaycan vətəndaşı həlak olmuş, digəri isə ağır yaralanmışdı. Hadisə Azərbaycan–İran münasibətlərində ciddi gərginlik yaratmış və rəsmi Bakı buna sərt reaksiya vermişdi.
Azərbaycan hər zaman bəyan edib ki, onun ərazisi heç vaxt başqa dövlətlərə qarşı istifadə olunmayacaq. Bu prinsip dövlətimizin xarici siyasətinin əsas xəttini təşkil edir. Buna baxmayaraq, bəzi dairələr əsassız ittihamlarla Azərbaycanı gözdən salmağa, xüsusilə də İranda yaşayan azərbaycanlıların fikirlərinə təsir göstərməyə çalışırlar. Halbuki müstəqil Azərbaycan dövləti bütün dünyada yaşayan azərbaycanlılar üçün ümid və qürur mənbəyidir”.
O əlavə edib ki, Azərbaycan öz ərazi bütövlüyünü qorumağa qadir olduğunu artıq sübut edib: “Qarabağda zamanı əldə olunan qələbə Azərbaycan ordusunun gücünü və xalqımızın birliyini bütün dünyaya göstərdi.
Azərbaycan heç vaxt təcavüzkar siyasət yürütməyib, lakin ölkəmizə qarşı yönəlmiş hər hansı təhlükə və ya təxribat cavabsız qalmayacaq. Dövlətimizin təhlükəsizliyini təmin edən qurumlar – Silahlı Qüvvələr, sərhəd xidmətləri və xüsusi təyinatlı qüvvələr hər zaman ölkəmizin müdafiəsinə hazırdır.
Bu hadisə bir daha göstərir ki, regionda sabitliyin qorunması üçün bütün dövlətlər beynəlxalq hüquqa və qonşuluq prinsiplərinə hörmətlə yanaşmalıdır. Azərbaycan isə bundan sonra da sülh, təhlükəsizlik və əməkdaşlıq siyasətini davam etdirəcək, lakin dövlətimizin suverenliyinə qarşı yönəlmiş hər hansı addıma qətiyyətlə cavab verməkdən çəkinməyəcək.
İran əslində qonşularına qarşı bu hərəkəti ilə özünü intihara sürüklədi. Bu cür təxribatçı cəhdlərə bölgəni gərginliyə sürükləyən hərəkətlərlə İran dövlətçiliyinin, nə da xalqının milli maraqlarına xidmət etmir. Əksinə intihara və uçuruma yuvarlanır.
Son olaraq cənab Prezidentin Təhlükəsizlik Şurasının bu gün keçirilən iclasında söylədiyi fikirlər açıq şəkildə mesaj verdiki, Azərbaycanın ərazisinə təcavüz qəbul edilməzdir və “Dəmir Yumruq” hər zaman hazırdır”.
