23–27 aprel tarixlərində Cüdo üzrə Qitənin ən güclüləri Monteneqroda bir araya gəlib.
İctimai.az xəbər verir ki, Azərbaycan cüdoçuları Monteneqroda keçirilən böyüklər arasında Avropa çempionatını 5 medalla başa vurub. Milli komandamız Podqoritsa şəhərində baş tutan qitə yarışında 1 gümüş və 4 bürünc medal əldə edib. -100 kq çəki dərəcəsində tatamiyə çıxan Zelim Kotsoyev gümüş medala yiyələnib. Əhməd Yusifov (-60 kq), Rəşid Məmmədəliyev (-73 kq), Zelim Tçkayev (-81 kq) və Murad Fətiyev (-90 kq) bürünc medal qazanıb.
Uşanqi Kokauri (+100 kq) turniri 5-ci, Turan Bayramov (-60 kq) isə 7-ci pillədə tamamlayıb. Yığma mötəbər turnirdə qarışıq komanda yarışında da iştirak edib.
Yekunda Azərbaycan medalların əyarına görə 47 ölkə arasında ümumi komanda hesabında 10-cu, kişilər arasında isə 5-ci yeri tutub. Ölkəmizi Avropa çempionatında 12 çəki dərəcəsində 15 cüdoçu (9 kişi, 6 qadın) təmsil edib. Azəbaycan cüdo tarixində ilk dəfə olaraq idmançılarımız qitə yarışında beş müxtəlif çəki dərəcəsində fəxri kürsüyə yüksəlib.
Qeyd edək ki, Avropa Cüdo Federasiyasının rəsmi dəvətinə əsasən Azərbaycan Respublikası Milli Məclisin Gənclər və İdman Komitəsinin üzvü, millət vəkili, Azərbaycan Cüdo Federasiyası İdarə Heyətinin üzvü Asif Əsgərov Monteneqronun Podqoritsa şəhərində keçirilən Avropa çempionatına dəvət olunmuşdur.
Millət vəkili Asif Əsgərov Avropa çempionatının bürünc mükafatçısı Rəşid Məmmədəliyevin və komandalar arasında keçirilən yarışın mükafatlandırılma mərasimlərində iştirak etmişdir.
Qeyd edək ki, Monteneqronun Gənclər və idman Naziri Draqoslav Şekiçin dəvətinə əsasən, Milli Məclisin Gəncər və İdman Komitəsinin üzvü, millət vəkili, Azərbaycan Cüdo Federasiyası İdarə Heyətinin üzvü Asif Əsgərov, Monteneqro Cüdo Federasiyasının prezidenti Jovica Receviç, Gürcüstan Respublikasının Gənclər və İdman naziri Salva Qoqoladze arasında da görüş keçirilmişdir.
Görüş zamanı millət vəkili qeyd etmişdir ki, 2024-cü il tarixdə Azərbaycan Respublikası Milli Məclisin sədri Sahibə xanım Qafarova Monteneqro Respublikasına rəsmi səfəri çərçivəsində bu ölkənin Prezidenti Yakov Milatoviç ilə görüşmüş, Azərbaycan Respublikası Prezidenti İlham Əliyevin ölkəmizdə keçiriləcən BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyası (COP29)-da iştirak etmək üçün dəvət məktubunu təqdim etmişdir.
Eyni zamanda görüş zamanı aparılan geniş söhbətlər əsasında dövlətlər arasında qarşılıqlı dostluq münasibətləri, Monteneqro Respublikasının prezidenti cənab Yakov Milatoviçin Bakıda keçirilən COP 29 tədbirində iştirakı, və ölkə prezidendi cənab İlham Əliyevlə möhkəm dostluq münasibətlərinin olması xüsusilə vurğulanmışdır.
Millət vəkili qeyd etmişdir ki, Azərbaycanın beynəlxalq aləmdə idman ölkəsi kimi tanınması və mötəbər arenalarda naliyyətlərinin olması təməlində dövlətimizin uğurlu idman siyasəti dayanır.
Görüşün sonunda xatirə şəkilləri çəkilmişdir.
