Azərbaycan xalqı qarşısında tarixi xidmətləri olan şəxslər unudulmamalıdır.
Bu gün müasir Azərbaycanın qurucusu, Azərbaycançılıq ideologiyasının banisi Heydər Əliyevin 100-cü ildönümüdür. Müxalifət olaraq Məhəmməd Əmin Rəsulzadəni, Əbülfəz Elçibəyi sevdiyimiz qədər Heydər Əliyevi də sevməli və xatırlamalıyıq. Bu bir siyasi mədəniyyət nümunəsi olmalıdır.
İnformasiya.az xəbər verir ki, bunu Milli Cəbhə Partiyasının (MCP) sədr müavini Ehtiram Mehdiyev özünün feysbuk hesabında yazıb.
O, qeyd edib ki, biz bu alicənab addımı dəfələrlə mərhum Heydər Əliyevdən görmüşük. Heydər Əliyev Türkiyəyə səfər edərkən Məhəmməd Əmin Rəsulzadənin məzarını ziyarət edib, onun şəxsiyyətinə hörmət etdiyini, ehtiramla yanaşdığını nümayiş etdirib. Elçibəy də Heydər Əliyevi Bakıya dəvət etməklə çox ciddi siyasi addım atmışdır. Həmçinin, Heydər Əliyev Əbülfəz Elçibəyin dəfninə qatılmaqla ona dəyər verdiyini göstərmişdir.
“Bu gün də bu münasibəti Prezident İlham Əliyevin və birinci vitse-prezident Mehriban xanım Əliyevanın timsalında bir daha görürük. Əbülfəz Elçibəyin həyat yoldaşı Həlimə Əliyeva vəfat edərkən birinci vitse-prezident Mehriban xanım Əliyeva onun ailəsinə başsağlığı vermiş, mərhumun yas mərasimi ilə bağlı xərcləri öz üzərinə götürmüşdür” – deyə E.Mehdiyev sözlərinə əlavə edib.
Ehtiram Mehdiyev onu da vurğulayıb ki, ancaq bəzi qaragüruhçu qüvvələr siyasətdə sivil münasibətlərin yaranmasını nədənsə qısqanclıqla qarşılayır, özlərinin düşmən mövqeyini həmişə biruzə verirlər. Hesab edirəm ki, cəmiyyətimizin xeyrinə olan belə sivil siyasi münasibətlər davam etdirilməlidir.
O, “dərin hörmət və sevgi ilə anırıq” – deyə sözlərini bitirib.
