Bir il öncə Ağ Evdə Azərbaycan və Ermənistan arasında sülh sazişi layihəsinin paraflanması ölkəmizin son illərdə qazandığı ən böyük diplomatik uğurlardan biri kimi tarixə düşdü. Bu addım Azərbaycanın gücünün, siyasi iradəsinin və Prezident İlham Əliyevin məqsədyönlü, strateji siyasətinin növbəti təsdiqi oldu. Vətən müharibəsində qazanılan Zəfərdən sonra formalaşan yeni reallıq bu dəfə diplomatik müstəvidə rəsmiləşdirildi.
İndi əsas məsələ paraflanmış sənədin imzalanmasına gedən yolun tamamlanmasıdır. Bunun üçün Ermənistan Konstitusiyasındakı Azərbaycana qarşı ərazi iddialarını ehtiva edən müddəaların dəyişdirilməsi və referendum keçirilməsi gözlənilir.
İrəvan bu addımı nə vaxt atacaq? Sülh sazişi nə qədər tez imzalana bilər?
Demokratik Maarifçilik Partiyasının sədri, Milli Məclisin deputatı Elşən Musayev Musavat.com-da diqqətlərə çatdırdı ki, Azərbaycan və Ermənistan arasında sülh sazişi layihəsinin paraflanması dövlətimizin son illər əldə etdiyi ən böyük qələbələrdən biridir: “Məlum diplomatik uğur həm də o həqiqətin göstəricisi və təsdiqidir ki, bu gün Azərbaycanın mövqeyi, gücü ən üst səviyyədədir və belə bir durumun mövcudluğu heç şübhəsiz ki, hər birimiz üçün böyük şərəfdir.
Paraflanma hüquq praktikasında geniş istifadə olunan prosedurdur, siyasi razılaşmanın əhəmiyyətli hissəsidir və diplomatik iradəni göstərən mühüm addımlardan biridir. Yaxşı bəs biz bu mərhələyə, bu etapa necə gəlib çatdıq? Təbii ki, Müzəffər Liderimiz İlham Əliyevin yürütdüyü məqsədyönlü və müdrik siyasət nəticəsində. Məhz onun rəhbərliyi və düzgün strategiyası ilə Azərbaycan Vətən Müharibəsini qazandı və hazırda, post-müharibə dövründə də dövlətimiz öz qüdrətini günü-gündən artırmaqdadır. Təbii ki, bütün bölgə əhlinin arzusu sülhdür, hamının gözlədiyi yekun sənəddir. Amma Vaşinqton bəyannaməsində də açıq göstərilir ki, sazişin imzalanması üçün əlavə tədbirlərin görülməsinə ehtiyac var. Və burada nəzərdə tutulan əsas xətt, istiqamət Ermənistan Konstitusiyasındakı bəzi müddəaların ana qanundan tamamən çıxarılmasıdır. Bunun üçünsə Referenduma ehtiyac var. O zaman gözlənti nədir? Şəxsən mənim qənaətim belədir: Ermənistan rəhbərliyi tezliklə Referenduma gedəcək və sülh sazişinin imzalanması gecikməyəcək. Niyə? Çünki, artıq Ermənistan dövlətinin, erməni cəmiyyətinin özü də anlayır və bu gerçəkliklə barışıb ki, Azərbaycanla düşmənçilik kimsəyə fayda vermir, verməyib, bundan sonra da verməyəcək. Eyni zamanda düşünürəm ki, yekun sülh sazişinin tezliklə imzalanması və Azərbaycan kimi qüdrətli, ləyaqətli, ədalətli qonşu ilə münasibətlərin normallaşması indiki situasiyada Ermənistanın özünə hava – su kimi lazımdır”.
Cavanşir Abbaslı
Musavat.com
