Azərbaycan ikitərəfli və çoxtərəfli müstəvidə tərəfdaşlarla qarşılıqlı faydalı, bərabərhüquqlu və uzunmüddətli strateji maraqlara əsaslanan münasibətlərin qurulmasını və genişlənməsini öz siyasətinin prioritet istiqamətlərindən biri kimi müəyyənləşdirib. Bu günlərdə dost ölkələrin liderlərinin Azərbaycana səfərləri, aparılan müzakirələr, imzalanan sənədlər, keçirilən biznes forumlar möhtərəm Prezidentimiz tərəfindən ötən illər ərzində yürüdülən uğurlu siyasətin nəticəsidir.
Azərbaycana olan inam və etibarın, əldə olunan tərəqqinin təzahürüdür ki, ölkəmiz ilə strateji tərəfdaşlıq əlaqələri quran dövlətlərin sayı ildən-ilə artır. Azərbaycan sözünə və öhdəliklərinə sadiq ölkə kimi beynəlxalq nüfuzunu daha da gücləndirir. Eyni zamanda qeyd etmək lazımdır ki, fəal siyasi dialoq əsasında formalaşan tərəfdaşlıqlar enerji, nəqliyyat, müdafiə sənayesi, ticarət, investisiya, humanitar mübadilə və mədəni əlaqələri əhatə edən çoxşaxəli əməkdaşlıq gündəliyi ilə müşayiət olunur.
Bu gün Azərbaycan Avropa məkanında etibarlı tərəfdaş kimi güclü mövqe formalaşdırıb. Bu baxımdan Çexiya ilə strateji tərəfdaşlığa əsaslanan münasibətləri xüsusi qeyd etmək lazımdır. Fəal siyasi təmaslar əməkdaşlığın genişləndirilməsi, qarşılıqlı sərmayələrin təşviqi və konkret layihələrin reallaşdırılması üçün əlverişli zəmin yaradıb. Qəbələdə Azərbaycan Prezidenti və Çexiyanın Baş naziri arasında keçirilən görüşlərdə də birgə layihələrin reallaşdırılması ilə bağlı məsələlər diqqət mərkəzində oldu.
Bu gün dünyanın 16 ölkəsinə qaz ixrac edən Azərbaycanın Çexiyaya qaz tədarükü imkanları da nəzərdən keçirildi. Qeyd edək ki, ötən illər ərzində enerji sahəsində ölkələrimiz arasında səmərəli əməkdaşlıq formalaşıb, eləcə də Azərbaycan Çexiyaya qonşu olan ölkələrə təbii qaz ixrac edir.
Azərbaycan bu gün müdafiə sənayesinin inkişafına böyük önəm verir. Çexiya da bu sahədə böyük təcrübəyə malikdir. Eyni zamanda müdafiə sənayesi sahəsində əməkdaşlıq bu günün reallıqları fonunda xüsusilə aktualdır. Bu baxımdan Azərbaycan və Çexiya liderlərinin birgə görüşündə istehsal və texnoloji əməkdaşlıq imkanlarının müzakirəsi göstərir ki, bu istiqamət yalnız mövcud əməkdaşlığın davamı deyil, eyni zamanda gələcək üçün böyük inkişaf potensialına malik strateji sahədir.
Ümumilikdə, Azərbaycan-Çexiya əməkdaşlığının fəal siyasi dialoq əsasında genişləndirilməsi üçün böyük potensial mövcuddur. Prezident İlham Əliyevin və Baş nazir Andrey Babişin iştirakı ilə keçirilən biznes forum da əməkdaşlığın müəyyənləşdirilən istiqamətlər üzrə dərinləşməsinə xidmət edəcək.
Şahin İsmayılov,
Gənclər və idman komitəsinin sədri
