Gənc Mühasiblər İctimai Birliyi Azərbaycan Respublikası Gənclər və İdman Nazirliyinin maliyyə dəstəyi ilə həyata keçirilən “Peşəkar mühasibliyə doğru” layihəsi çərçivəsində 24 yanvar 2025-ci il tarixində Lənkəran şəhər Mədəniyyət Mərkəzində Karyera Forumu təşkil etmişdir.
Layihənin ana məqsədi mühasibatlıq ixtisası üzrə təhsil alan sonuncu kurs tələbələrini potensial kadr kimi yetişdirmək və onların məşğulluğunun təmin olunmasına dəstək göstərməkdən ibarətdir.
Təşəbbüs çərçivəsində ölkənin iki böyük regionunda – Gəncə və Lənkəran şəhərlərində maliyyə və mühasibat uçotu sahəsində peşəkar kadrların hazırlanması, habelə təlim keçmiş yüksəkixtisaslı gənclərin işlə təmin olunması hədəflənmişdir.
Layihə müddətində hər şəhərdən 40 nəfər olmaqla, mühasibat uçotu və audit ixtisasını bitirməkdə olan sonuncu kurs tələbələrinə xüsusi təlim kursları keçirilmişdir.
Layihənin yekun fəaliyyəti kimi baş tutan Karyera Forumunda dövlət və özəl müəssisələrin nümayəndələri, eləcə də təşkilatın əməkdaşlıq etdiyi potensial işəgötürənlər iştirak etmişlər. Forum zamanı gənclərin maarifləndirilməsi və ixtisaslaşdırılması məqsədilə peşəkar mütəxəssislərin çıxışları dinlənilmiş və panel müzakirələri təşkil olunmuşdur.
