Prezident İlham Əliyevin müdrik və qətiyyətli rəhbərliyi ilə həyata keçirilən çoxvektorlu xarici siyasət kursu nəticəsində bu gün ölkəmiz beynəlxalq münasibətlər sistemindəki mövqelərini gündən-günə möhkəmləndirir. Yalnız regionunda deyil, artıq daha geniş coğrafiyada mühüm güc mərkəzlərindən birinə çevrilən Azərbaycan daim tərəfdaş ölkələrlə qarşılıqlı faydalı əməkdaşlıq əlaqələrinin genişləndirilməsində maraqlı olub.
Bu sözləri AZƏRTAC-a açıqlamasında Milli Məclisin Gənclər və idman komitəsinin sədri Şahin İsmayılov söyləyib.
Şahin İsmayılov qeyd edib ki, Azərbaycan dost ölkə olan Macarıstan ilə əməkdaşlığa böyük önəm verir. Ölkələrimiz arasında 2014-cü ildə qurulan strateji tərəfdaşlıq münasibətləri 2023-cü ildə Genişləndirilmiş Strateji Tərəfdaşlığa dair Birgə Bəyannamənin imzalanması ilə daha da möhkəmləndirilib.
Azərbaycanın ilə Macarıstanın müstəqil xarici siyasət yürüdən nadir ölkələrdən olduqlarını söyləyən komitə sədri deyib: “Ötən illər ərzində həyata keçirilən yüksəksəviyyəli səfərlər, aparılan müzakirələr, qəbul olunan qərarlar və onların səmərəli icrası ölkələrimiz arasında qarşılıqlı faydalı əməkdaşlığın inkişafını təmin edib”.
Azərbaycanın təşəbbüsü və birbaşa iştirakı ilə həyata keçirilən strateji əhəmiyyətli enerji layihələrinin Avropanın enerji təhlükəsizliyinin ayrılmaz tərkib hissəsinə çevrildiyini söyləyən Şahin İsmayılov qeyd edib ki, ixrac coğrafiyasını daha da genişləndirən Azərbaycan bu gün 12 dövləti, o cümlədən Macarıstan da daxil olmaqla 10 Avropa ölkəsini təbii qazla təchiz edir. Eyni zamanda, Macarıstan şirkəti Azərbaycanda neft-qaz sahəsində müxtəlif layihələrin icrasında iştirak edir. Həmçinin ölkələrimiz yaşıl enerji sahəsində də birgə layihələr icra edirlər. Bu xüsusda, 2022-ci ildə imzalanmış “Azərbaycan, Gürcüstan, Rumıniya və Macarıstan Hökumətləri arasında yaşıl enerjinin inkişafı və ötürülməsi sahəsində strateji tərəfdaşlıq haqqında Saziş” böyük əhəmiyyət kəsb edir.
“Prezident İlham Əliyev Macarıstanda mətbuata bəyanatında Azərbaycanın Vətən müharibəsindəki tarixi Zəfərinə, sülh danışıqlarına dair həqiqətləri bir daha beynəlxalq ictimaiyyətin diqqətinə çatdırdı. Ermənistanın 30 illik işğalına 44 gün ərzində son qoyan Azərbaycan eyni zamanda sülh müqaviləsinin mətninin də müəllifidir. Ermənistan konstitusiyasında Azərbaycana qarşı olan ərazi iddiasının aradan qaldırılması, ATƏT-in Minsk qrupunun ləğv edilməsi zəruridir. Ermənistan tərəfi gec-tez Azərbaycanın bu haqlı tələblərini də icra edəcək”, – deyə komitə sədri vurğulayıb.
