Məlum olduğu kimi, Azərbaycan Respublikasının Prezidenti, Silahlı Qüvvələrin Müzəffər Ali Baş Komandanı, cənab İlham Əliyevin rəhbərliyi, məğlubedilməz Azərbaycan Ordusunun rəşadəti və qəhrəman xalqımızın birliyi sayəsində, doğma Qarabağımızın mənfur erməni işğalından azad olunması uğrunda gedən Vətən müharibəsində möhtəşəm qələbə qazandıq. “Dəmir Yumruq” devizi altında ölkə rəhbərinin, Ali Baş Komandanın başçılığı ilə qəhrəman ordumuz müstəqil Azərbaycan dövlətinin tarixinə Qarabağ-Zəfər salnaməsini yazdı. Şübhəsiz ki, bütün dünya bir daha Azərbaycan Respublikasının Prezidenti, Silahlı Qüvvələrin Müzəffər Ali Baş Komandanı, cənab İlham Əliyevin simasında əsl lider, qorxmaz sərkərdə və mükəmməl siyasi xadim gördü. Bu Qələbə nəyinki Azərbaycanın bütün türk dünyasının, həmçinin, haqqın, ədalətin qələbəsi oldu. Beləliklə, Azərbaycana qarşı qərəzli mövqedə olan bəzi dünya dövlətləri Azərbaycanın hansı gücə malik olmasını bir daha görmüş oldu. Qarabağ mənfur erməni işğalından azad edildi.
Vətən yolunda Şəhidlik zirvəsinə ucalanlar da oldu, qazi adını alanlar da. Uca Allahdan qəhrəman Şəhidlərimizə rəhmət, qazilərimizə şəfa diləyirəm. Təbii ki, əldə etdiyimiz bu möhtəşəm Qələbə ilə Ermənistanın işğalçılıq siyasətinə son qoyuldu. Qəhrəman hərbçilərimizin şücaəti, rəşadəti hesabına, Şəhidlərimizin qanı-canı bahasına bütün dünya müstəqil Azərbaycanın şanlı qələbəsinin şahidi oldu. Xalqımızın çoxəsrlik tarixində buna bənzər parlaq Qələbə hələ əldə olunmamışdı. Azərbaycan xalqı, Azərbaycan Ordusu öz Prezidentinin və Ali Baş Komandanının ətrafında “Dəmir Yumruq” kimi birləşərək düşmənə sarsıdıcı zərbələr endirdi, düşməni məğlub etdi, tarixi ədaləti və ölkəmizin ərazi bütövlüyünü bərpa etdi. Şübhəsiz ki, “Dəmir Yumruq” Azərbaycan xalqının həmrəyliyinin və xalq-ordu birliyin rəmzinə çevrildi. Bu gün, Ümummilli Lider Heydər Əliyevin müstəsna xidmətləri sayəsində formalaşan və inkişaf yoluna qədəm qoyan Azərbaycan Silahlı Qüvvələri, Azərbaycan Respublikasının Prezidenti, Müzəffər Ali Baş Komandan, cənab İlham Əliyevin rəhbərliyi altında öz şərəfli missiyasını uğurla davam etdirir. Məhz bu uğurlu siyasət nəticəsində, Azərbaycan Ordusu dünyanın ən güclü orduları sırasındadır. Ordumuzun müasir texnika ilə təchizatı, müntəzəm olaraq keçirilmiş təlimlər, ordumuzun döyüş potensialının gücləndirilməsi, hərbi sənayenin yaradılması və idxaldan müəyyən dərəcədə asılılığın azaldılması da məqsədyönlü şəkildə aparılan siyasətin tərkib hissəsidir.
Müharibələrdə böyük qələbələrin əsasında duran ən başlıca amil xalq-dövlət-ordu birliyinin sarsılmaz vəhdətinin təmin olunmasıdır. Vətən müharibəsi dünya azərbaycanlılarının birliyinin sarsılmazlığını, xalqımızın Vətən torpaqlarının azad edilməsi naminə “Dəmir Yumruq” kimi birləşdiyini nümayiş etdirdi. Dünyanın müxtəlif ölkələrində yaşayan azərbaycanlılar, habelə, Azərbaycanın haqq işinə dəstək verən digər xalqların nümayəndələri erməni lobbisinin apardığı çirkin kampaniyalara qarşı fədakarlıqla fəaliyyət göstərirdilər. Müharibənin gedişində xalq-dövlət-ordu birliyi daha da möhkəmləndi. Azərbaycanın bütün vətəndaşları etnik, sosial, dini baxımdan bütövlük nümayiş etdirdi, ön və arxa cəbhədə mükəmməl birlik yarandı
Qarabağ Azərbaycanın tarixi, əzəli və əbədi torpağıdır! Qarabağ Azərbaycandır!…
Sabit Mehdiyev,
YAP Beyləqan rayon təşkilatının məsləhətçisi
