Prezident İlham Əliyevin Yaxın Şərq Sülh Sammitində iştirakı bir daha sübut etdi ki, Azərbaycan orta güc kimi qlobal miqyasda aktiv iştirakçı rolunda çıxış edir.
Bunu Ölkə.az-a açıqlamasında Milli Məclisin Gənclər və idman komitəsinin sədri Şahin İsmayılov deyib.
“Cənab Prezidentin həyata keçirdiyi uğurlu çoxvektorlu xarici diplomatiya, eyni zamanda qlobal çağırışlara çevik reaksiya verərək milli maraqlara söykənən siyasət yürütməsi nəticəsində Azərbaycan Cənubi Qafqazda müharibənin və sülhün qalibi olmaqla yanaşı, bölgədə sülhün təminatçısı rolunda çıxış etməkdədir. Azərbaycanın yaratdığı bu reallığın nəticələri dünyanın digər bölgələrində də sülhün, təhlükəsizliyin təmin olunmasında bir təcrübə kimi öyrənilməkdədir. Azərbaycanın sülh, sabitlik, təhlükəsizlik və əməkdaşlıq formatlarının yaradılması istiqamətində qlobal miqyasda aktiv iştirakı beynəlxalq nüfuzunun artmasına, geosiyasi mövqeyinin daha da möhkəmlənməsinə xidmət edir. Azərbaycanın Yaxın Şərq Sülh Sammitində iştirakı bunun bariz nümunəsidir”, – deputat qeyd edib.
Deputat əlavə edib ki, geosiyasi mövqeyin möhkəmlənməsi isə öz növbəsində Azərbaycana dünyanın müxtəlif bölgələrində, o cümlədən Yaxın Şərqdə sülhün, təhlükəsizliyin və yeni sıx əməkdaşlıq formatlarının yaranmasına geniş imkanlar açacaq:
“Azərbaycan Yaxın Şərqdə sülhün, sabitliyin, təhlükəsizliyin əldə edilməsində və qorunub saxlanmasında maraqlı olduğundan bu istiqamətdə öz töhfəsini verməyə hazırdır. Azərbaycanı unikal edən ən mühüm məqam isə bir-biri ilə soyuq münasibətdə olan Yaxın Şərq ölkələri ilə çox sıx əlaqələrə malik olmasıdır. Məhz bu səbəbdən də Azərbaycan Yaxın Şərqdə sabitliyin və əməkdaşlıq mühitinin formalaşması üçün vasitəçi missiyasını həyata keçirməkdədir. Azərbaycanın vasitəçilik missiyası nəticəsində İsrail-Türkiyə, İsrail-Suriya arasında dialoq baş tutub.
Bundan əlavə, Azərbaycan bəzi Yaxın Şərq ölkələrində, xüsusən də Suriyada sabitliyin təmin olunması istiqamətində bir sıra layihələr həyata keçirməkdədir.
Region ölkələri ilə sıx əməkdaşlıq əlaqələrinin olması Azərbaycanın əldə etdiyi təcrübənin öyrənilməsinə yeni imkanlar yaradacaq və bu da nəticədə bütövlükdə Yaxın Şərqdə sülhün, təhlükəsizliyin əldə olunmasına xidmət edəcək. Bu da nəticə etibarilə yeni düzən fonunda Azərbaycanın geosiyasi mövqeyinin artaraq qlobal və regional sülhün, təhlükəsizliyin təmin olunmasında orta güc kimi ciddi aktor rolunda çıxış etməsinə yeni fürsətlər yaradacaq”.
