Nümayəndə heyəti noyabrın 28-də “Avrasiyada sülh və demokratiya” mövzusunda AEPF-nin 6-cı iclasında iştirak edib. İclasın açılış sessiyasında ICAPP Daimi Komitəsinin (DK) üzvü, AEPF-nin həmsədri, Nepal Kommunist Partiyası (UML) Mərkəzi Daimi Komitəsinin üzvü Racan Bhattaray, AEPF-nin həmsədri, CEVRO Universitetinin Asiya-Sakit Okean Araşdırmaları Mərkəzinin sədri Yan Zahradil, Macar Vətəndaş İttifaqının (Fides) vitse-prezidenti Kinqa Qal və ICAPP DK-nın sədri Çunq Eu-yonq çıxış ediblər. ICAPP-ın baş katibi Oh Sonqun təqdimatında AEPF-in fəaliyyət qaydalarına dəyişikliklərin edilməsindən və AEPF Bürosunun yeni tərkibinin seçilməsindən sonra iclas plenar sessiyalarla davam edib.
YAP İdarə Heyətinin üzvü, Milli Məclisin Gənclər və idman komitəsinin sədri, ICAPP Asiya Mədəniyyət Şurasının sədri Şahin İsmayılov ikinci plenar sessiyada çıxış edərək Azərbaycanın Cənubi Qafqazda sülhün təşviqi və dayanıqlı inkişafın təmin olunmasında mühüm rol oynadığını vurğulayıb: “Ərazi bütövlüyünün bərpasından sonra Azərbaycan yenidənqurma, reinteqrasiya və regional əməkdaşlığa əsaslanan yeni bir mərhələyə qədəm qoyub. Regionda yaranmış yeni sülh mühiti uzun illər davam edən münaqişələrdən sonra əməkdaşlıq və tərəqqi üçün real imkanlar açmışdır. Ölkəmiz Avrasiyada təkcə enerji və nəqliyyat qovşağı kimi deyil, eyni zamanda siyasi dialoqun təşviqedicisi kimi strateji mövqe tutur. Bu mövqe bizə yalnız regional deyil, həm də qlobal proseslərdə məsuliyyətlə iştirak etməyə imkan verir”.
Onun sözlərinə görə, Azərbaycanın təklif etdiyi baxış dinc, bağlantılı və demokratik Avrasiyadır: “Biz bu gələcəyi həm Şərq, həm də Qərbdəki tərəfdaşlarımızla birlikdə qurmağa hazırıq. Azərbaycan sübut etmişdir ki, ən mürəkkəb münaqişələr belə siyasi iradə, liderlik və sülhə inam sayəsində həll oluna bilər. Bu kontekstdə Zəngəzur dəhlizinin reallaşması xüsusi əhəmiyyət kəsb edir. Bu dəhliz təkcə Azərbaycan üçün deyil, bütün Avrasiya regionu üçün yeni nəqliyyat əlaqələri, iqtisadi əməkdaşlıq imkanları və siyasi sabitlik çərçivəsi yaradır. O, sadəcə logistika layihəsi deyil, mahiyyət etibarilə bir sülh layihəsidir. Azərbaycan və Ermənistan arasında Vaşinqtonda, Prezident Donald Trampın iştirakı ilə sülh sazişinin paraflanması bu prosesə göstərilən güclü beynəlxalq dəstəyi əks etdirir. Azərbaycan Respublikasının Prezidenti İlham Əliyevin şəxsi nüfuzu və diplomatik çevikliyi bu proseslərin irəliləməsində həlledici rol oynamışdır”.
Şahin İsmayılov çıxışının sonunda Azərbaycanın demokratik prinsiplərə əsaslanan çoxpartiyalı sistemində yer alan siyasi partiyaların da sülhə və demokratik inkişafa əhəmiyyətli töhfə verdiyini, müxtəlif siyasi qüvvələrin sabitlik və sülh naminə birgə dəstəyinin ölkəmizdə demokratik institutları və vətəndaş cəmiyyətini daha da möhkəmləndirdiyini qeyd edərək, ölkəmizin sülh yanaşmasının yalnız regionla məhdudlaşmadığını, Qoşulmama Hərəkatına sədrliyi dövründə, eləcə də BMT və digər beynəlxalq platformalarda fəal iştirakı vasitəsilə sülhü, ədaləti və beynəlxalq hüquqa hörməti daim təşviq etdiyini diqqətə çatdırıb.
Bağlanış sessiyasında müzakirələrin əsas nəticələrini özündə əks etdirən Budapeşt Bəyanatı qəbul edilib.
AEPF-nin 6-cı iclasına paralel olaraq Macarıstandakı Xristian Demokrat İnstitutu Fondunun təşkilatçılığı ilə “Dialoq və əməkdaşlığın gücləndirilməsi” mövzusunda beyin mərkəzlərinin görüşü də keçirilib. “Gələcəyə Körpü” Gənclər İctimai Birliyinin həmtəsisçisi və onun nəzdindəki “InnoHub” Beyin Mərkəzinin ideya müəllifi, Milli Məclisin deputatı Müşfiq Cəfərov iclasda təqdimatla çıxış edərək Azərbaycanın Gəncə şəhəri və ətraf regionlarında gənclər üçün təhsil və peşəkar inkişaf imkanlarını genişləndirməyə yönələn müasir innovasiya mərkəzi və analitik düşüncə platforması olan “InnoHub” Beyin Mərkəzinin fəaliyyəti haqqında ətraflı məlumat verib. Onun sözlərinə görə, beyin mərkəzinin təşkil etdiyi “InnoTalks” seminarları, ideya sessiyaları və müxtəlif icma təşəbbüsləri iştirakçılara əməkdaşlıq mühiti yaradır, onların yeni fikir mübadiləsinə, praktiki bacarıqlar qazanmasına və uzunmüddətli uğur üçün zəruri keyfiyyətlərini inkişaf etdirməsinə şərait yaradır.
Günün sonunda iştirakçılar Macarıstan Milli Assambleyasının Sədri Laszlo Köver adından verilən rəsmi ziyafətə də qatılıblar.
Noyabrın 29-da mədəni proqram çərçivəsində iştirakçıların Macarıstan Musiqi Evinə ziyarəti təşkil olunub.
Səfər noyabrın 29-da başa çatıb.
