“Üzeyir dünyasının əbədi sədası”
23 noyabr bəstəkarın evində anım günü tədbiri keçirildi.
Üzeyir Hacıbəyli Azərbaycan milli musiqisinin banisi və Şərqdə ilk operanın müəllifi kimi dünya musiqi tarixinə öz adını qızıl hərflərlə yazdırmış dahi sənətkardır. Onun yaradıcılığı milli və klassik üslubların unikal sintezini yoğrulmuş, musiqimizin sərhədlərini genişləndirmiş, xalqın ruhunu əks etdirən əsərləri ilə Azərbaycan mədəniyyətinin qızıl fondunu yaratmışdır. Onun yaradıcılığının zirvəsi sayılan “Koroğlu”, “Leyli və Məcnun” operaları və digər əsərləri yalnız musiqi incisi deyil, həm də milli özünüdərk və incəsənətin ən yüksək təzahürüdür.
23 noyabr tarixində Üzeyir Hacıbəylinin ev-muzeyində dahi Azərbaycan bəstəkarının anım gününə həsr olunmuş “Sənət və simfoniya: Üzeyir Hacıbəyli incəsənətin əbədi ruhunda” adlı tədbir keçirilib. Tədbir sənətşünas Sədaqət Əliyeva və Üzeyir Hacıbəylinin ev-muzeyinin təşkilatçılığı ilə təşkil olunub.
Tədbirin əvvəlində muzeyin ekspozisiya şöbəsinin müdiri, bəstəkar Vəfa Bağırzadə Üzeyir Hacıbəylinin bioqrafiyası və yaradıcılıq yoluna nəzər salıb.Ardınca muzeyin xüsusi qonağı əməkdar rəssam Tariyel Bəşirov tədbirdə çıxış edərək Tahir Salahovun “Üzeyir Hacıbəylinin portreti” əsasında toxunmuş xalça haqqında məlumat vermişdir.
Hidayət Sadıqzadə “Parafraz” adlı əsəri ilə tədbirin musiqili hissəsini başlatmışdır.Daha sonra bəstəkar Aytən Oqtayqızı Üzeyir Hacıbəylinin xatirəsinə həsr etdiyi “Üzeyir dünyası” romansı və “Dəyərli ömür” pyesi əsərini ifa edərək tədbirə rəng qatmışdır.
Bununla yanaşı, Üzeyir Hacıbəyli adına Bakı Musiqi Akademiyasının müəllimi, pianoçu-bəstəkar Nuranə Zeynalova fortepiano üçün “Qarabağ” fantaziyası əsərini ifa edib.
Tədbir sonra Üzeyir Hacıbəyliyə həsr olunmuş təqdimatla davam etmişdir.Belə ki, sənətşünas Sədaqət Əliyeva “Üzeyir Hacıbəyli obrazı təsviri incəsənət və xalq yaradıcılığında” mövzusunda mühazirə ilə çıxış edib.Sonda isə muzeyin əməkdaşı, sənətşünas Ləman Həsənova isə Vəcihə Səmədova və Tahir Salahovun həyat və yaradıcılığı haqqında təqdimata davam etmişdir.
Bu tədbir Üzeyir Hacıbəylinin yaradıcılığına göstərilən hörmət və incəsənət vasitəsilə onun əbədi xatirəsini yaşatmaq məqsədi daşıyırdı.
Üzeyir Hacıbəylinin ev-muzeyinin kiçik elmi işçisi
Xanım Sərvazqızı
