Deməli, çox maraqlı bir məqam var: “Milli Şura” adında məchul qurumun “inkognito” sədri Cəmil Həsənli, ara bir az sakitləşən kimi, istintaq ifadələri arasında fasilə yaranan kimi, quyruğu qapı arasından azca çıxan kimi dərhal dönüb olur – “şirpələng”…
Anındaca dilə gəlir, “guruldayır” və statuslar yazmağa başlayır. Deyim ki, əslində onu hardasa başa düşmək də olar. Çün, yuxarı baxır bığ, aşağı baxır saqqal. Sakit dayansa ətrafındakı qaramatlar qınayacaq, səsini çıxarsa (yüz dənə əyri işin içində olduğu üçün) özünü işə salacaq.
Qısası, həqiqətən, çox çətindir “proSessor”un hazırki durumu…
“Mehdiyev işi” yeni pöhrələnəndə aradan çıxmaq istədi. Adını da qoydu ki, ailəvi toya çağırıblar. Öz də hara? Dubaya…
Evin tikilsin, səni heç burda, öz vətənində, 5 ildə bir dəfə adam bilib, adam sayıb toya çağıran olmur. Dubay nə idi?!
Əlbət, mif idi. Yalan idi. Nağıl idi.
Sonra uydurdu ki, guya bunu hansısa festivala (lap olsun tədbirə) dəvət ediblər. Bu variant da keçmədi. Ardınca gopa basdı ki, Londondan müraciət var, dərs deməyə çağırırlar. Həmin məlumat da öz təsdiqini tapmadı.
Və indi….Ağlına təzə ideya gəlmir deyə ortalıqda girinc qalıb.
Üstəlik, hara da gedirsən qarşına çıxır. Dağüstü parka yol alırsan, ordadır. “Fəvvarələr meydanı”na yol alırsan – şlaqbaum kimi qarşında dayanıb. “Hüseyn Cavid” prospektində, ixtiyari kafedə kofe içirsən – bir baxırsan, yolun düz ortası ilə şütüdü və qəfil gözdən itdi, getdi.
Arvad evə buraxmır, istintaq orqanları xaricə…
Ailə – uşaq evdə saymır, insanlar çöldə…
Ona görə fürsət düşən kimi kişilənmək, kişiləşmək, kişi kimi görünmək, kişi nisgilini unutmaq, “kişi qırığı” kompleksindən uzaqlaşmaq keçir könlündən. Və bunun da tək yolunu, çarəsini yekəlləmə, uzunnama, boş – boş, mənasız, dəxilsiz statuslar yazmaqda görür: Ay, Şvabe elə qırıldatdı, ay Kərimli barədə filan məqalə belə getdi, ay Avropa məhkəməsi feşman şey söylədi…
Yaxşı, bəs sən özün neyləmisən?! Yanına çox yox, 3 nəfər adam salıb məhkəmə önünə, salonuna getmisənmi? Haqqında bəhs etdiyin Kərimliyə dəstək vermisənmi? Dostluğunu, həmrəyliyini göstərmisənmi?
Yox, əlbət! Xeyr! Qətiyyən! Əsla!
Çünki, sən – bir addımlığındakı qan bağlarına, ailənə, övladlarına necə sahiblənmisənsə, dostlarına da bax o cür sahiblənirsən!
Çünki sən – yalnız və yalnız maraq, çıxar, mənfəət adamısan!
Çünki sən – kiminsə arxasında dağ kimi deyil, ən yaxşı halda dərə kimi dayanmağı bacarırsan!
Çünki sən – naqis, naxələf şəxsiyyət olduğun kimi namərd də yol yoldaşısan!
Çünki sən – boş – boş lovğalanmaqdan, loppazlanmaqdan, xoruzlanmaqdan savayı heç nə bacarmırsan!
Nəhayət. Çünki;
Məşhur lətifədə: “Mən ancaq çay işinə baxıram” – deyildiyi kimi, sən də ancaq status yazmaq işinə baxırsan.
Sadəcə və sadəcə…
Elşən Musayev,
Milli Məclisin deputatı, Demokratik Maarifçilik Partiyasının sədri.
