Bakı şəhəri Yasamal rayonu İ. İbrahimov adına 167 nömrəli tam orta məktəbin ingilis dili müəllimi Mövsümova Gülnar tərəfindən həyata keçirilən “SpeakUp Azerbaijan – Xarici müəllimlərlə ingilis dili danışıq dərsləri” qrant layihəsi uğurla yekunlaşıb.
Layihə çərçivəsində 8-ci sinif şagirdlərindən ibarət 20 nəfərlik qrup üçün xarici müəllim Nyara Mtiziranın iştirakı ilə ingilis dili danışıq dərsləri təşkil olunub. Ümumilikdə keçirilən 24 dərs ərzində şagirdlər müxtəlif mövzular ətrafında müzakirələr aparıb, təqdimatlar hazırlayıb və rol oyunlarında iştirak edərək ingilis dilində ünsiyyət bacarıqlarını inkişaf etdiriblər.
Təlim proqramı iştirakçıların danışıq zamanı özlərini daha sərbəst ifadə etmələrinə, lüğət ehtiyatlarını genişləndirmələrinə və düzgün tələffüz bacarıqlarını təkmilləşdirmələrinə imkan yaradıb. Xarici müəllimlə birbaşa ünsiyyət mühiti şagirdlərin dil praktikasını artıraraq onların ingilis dilindən gündəlik ünsiyyətdə istifadə bacarıqlarını gücləndirib.
Layihənin yekununda təşkil olunan bağlanış mərasimində proqramın nəticələri təqdim olunub, iştirakçıların qazandıqları nailiyyətlər haqqında məlumat verilib. Şagirdlər layihə müddətində əldə etdikləri bilik və təcrübələri bölüşərək fəaliyyətlərin onlar üçün faydalı olduğunu bildiriblər.
“SpeakUp Azerbaijan – Xarici müəllimlərlə ingilis dili danışıq dərsləri” layihəsi şagirdlərin xarici dil bacarıqlarının inkişafına, özünəinamlarının artırılmasına və gələcək təhsil imkanlarına hazırlanmasına mühüm töhfə verib. Layihə eyni zamanda məktəblilərin beynəlxalq ünsiyyət bacarıqlarının formalaşdırılması istiqamətində uğurlu nəticələr əldə edib.
