Müasir Azərbaycan tarixində xüsusi yer tutan Milli Qurtuluş Günü xalqımızın milli iradəsinin, həmrəyliyinin və dövlətçilik uğrunda mübarizəsinin rəmzidir.
Bu fikri AZƏRTAC-a açıqlamasında Milli Məclisin Gənclər və idman komitəsinin sədri Şahin İsmayılov bildirib.
“1991-ci ildə dövlət müstəqilliyini bərpa edən Azərbaycan ilk illərdə ciddi təhdidlərlə üzləşmişdi. Ermənistanın işğalçılıq siyasəti nəticəsində torpaqlarımızın ardıcıl olaraq işğal edilməsi, ölkədə siyasi qarşıdurmaların dərinləşməsi, idarəetmədə yaranmış böhran, iqtisadi tənəzzül və sosial problemlər müstəqilliyimizin gələcək taleyini sual altına qoyurdu. Dövlət institutları zəifləyir, ölkədə xaos və anarxiya meyilləri güclənirdi. Belə bir mürəkkəb şəraitdə Azərbaycan xalqı nicat yolunu zəngin dövlətçilik təcrübəsinə malik, dahi siyasətçi Ulu Öndər Heydər Əliyevin hakimiyyətə qayıdışında gördü”, – deyə Şahin İsmayılov qeyd edib.
Komitə sədri qeyd edib ki, 1993-cü il iyunun 15-də Ümummilli Lider Heydər Əliyevin yenidən siyasi hakimiyyətə qayıdışı ölkəmizin tarixində yeni mərhələnin başlanğıcı oldu. Ulu Öndərin uzaqgörən siyasəti, zəngin idarəçilik təcrübəsi və milli maraqlara söykənən fəaliyyəti nəticəsində Azərbaycan parçalanmaq və müstəqilliyini itirmək təhlükəsindən xilas oldu. Ölkədə ictimai-siyasi sabitlik bərpa edildi, vətəndaş qarşıdurmasının qarşısı alındı, separatçılıq meyilləri neytrallaşdırıldı və dövlət quruculuğu prosesinə start verildi.
Şahin İsmayılov bildirib ki, Milli Qurtuluş Azərbaycanın gələcək inkişaf strategiyasının müəyyənləşdirilməsi baxımından da böyük əhəmiyyət daşıyır. Məhz həmin dövrdə Ulu Öndər tərəfindən qəbul edilən qərarlar, reallaşdırılan islahatlar Azərbaycanın dayanıqlı inkişafının əsasını təşkil etdi. Ulu Öndər Heydər Əliyevin rəhbərliyi ilə dövlət idarəçiliyinin əsasları yenidən quruldu, hüquqi dövlət və vətəndaş cəmiyyəti quruculuğu istiqamətində mühüm addımlar atıldı. Azərbaycanın ilk milli Konstitusiyasının qəbul edilməsi, demokratik institutların formalaşdırılması, bazar iqtisadiyyatına keçidin təmin olunması və dövlət müstəqilliyinin beynəlxalq müstəvidə möhkəmləndirilməsi həmin illərin ən mühüm nailiyyətləri sırasında yer alır.
“Azərbaycanın iqtisadi yüksəlişinin əsasını təşkil edən enerji strategiyası da məhz Ümummilli Lider tərəfindən müəyyənləşdirilib. 1994-cü ildə imzalanan “Əsrin müqaviləsi” ölkəmizin beynəlxalq enerji bazarına inteqrasiyasını təmin etməklə yanaşı, gələcək inkişaf üçün güclü maliyyə və iqtisadi baza formalaşdırdı. Sonrakı illərdə həyata keçirilən iri enerji və nəqliyyat layihələri Azərbaycanın regional və qlobal əhəmiyyətə malik strateji tərəfdaşa çevrilməsinə imkan yaratdı”, – deyə komitə sədri vurğulayıb.
Milli Qurtuluşdan başlanan inkişaf yolunun Prezident İlham Əliyevin müdrik rəhbərliyi ilə uğurla davam etdirildiyini söyləyən Şahin İsmayılov deyib ki, son illərdə Azərbaycanın əldə etdiyi möhtəşəm uğurlar, xüsusilə torpaqlarımızın işğaldan azad olunması, dövlət suverenliyinin tam bərpa edilməsi və Qarabağda, Şərqi Zəngəzurda həyata keçirilən genişmiqyaslı bərpa-quruculuq işləri Ulu Öndərin siyasi kursunun uğurlu davamının nəticəsidir.
Bu gün qüdrətli Azərbaycanın qalib dövlət kimi dünya birliyində öz layiqli yerini tutduğunu söyləyən Şahin İsmayılov deyib: “Beləliklə, Milli Qurtuluş Günü müdrik xalqımızın Ümummilli Liderinə yüksək ehtiramının ifadəsidir”.
