“Dünən siyasi partiya rəhbərləri, media mənsubları və vətəndaş cəmiyyətinin üzvləri ilə bərabər Cəbrayıl və Zəngilana növbəti səfərimiz baş tutdu. Niyə növbəti? Çünki artıq həmin səfərlər mütəmadi xarakter alıb, davamlıdır və dünənki gedişimiz də sayca 8-ci idi. Və deyim ki, hər səfərdə gördüklərimiz bizi yaxşı mənada heyrətləndirir, eyni zamanda son dərəcə qürurlandırır. Həqiqətən, nə yaxşı, bu günləri yaşadıq, nə yaxşı ən ümdə arzumuza çatdıq, nə yaxşı torpaqlarımız artıq öz əzəli sahibindədir.” – 7NEWS.AZ xəbər verir ki, bu fikirləri Demokratik Maarifçilik Partiyasının sədri, Milli Məclisin deputatı Elşən Musayev bildirib.
“Tam səmimi deyim, mən Cəbrayılı, Zəngilanı bu dəfə tanımadım və 1 il əvvəl gördüyüm mənzərənin tam fərqlisi ilə qarşılaşdım. O anlamda ki, inkişaf, yenidənqurma prosesi maksimum səviyyədədir! Hər gün, hər saat, hər dəqiqə hansısa işlər görülür. Yeni çəkilən yollar, yeni tikilən yaşayış binaları, inzibati binalar, məscidlər, otellər, iaşə obyektləri, sənaye mərkəzləri…göz oxşayır. Və əminəm, 1 il sonra getsəm, yenə eyni düşüncədə olacam və oraları tanımayacam. Çünki sürət ildırım sürətidir. Dövlət bütün gücünü, resursunu səfərbər edib və bir azdan Qarabağımız nəinki Azərbaycanın, hətta dünyanın ən gözəl bölgələrindən birinə çeviriləcək.
Ayrıca, bir məqamı da xüsusi qeyd edim ki, belə səfərlərin partiyalararası münasibətlərin inkişasına verdiyi töhfə, fayda da çox böyükdür. Ona görə ki, ünsiyyət yaranır, aradakı buzlar əriyir, düşmənçilik meylləri azalır, əsl, sivil rəqabət ənənəsi formalaşır.
Əvvəllər də vardımı belə şərait? Bəli!! Həmin şərait daim olub. Eyni zamanda ölkədəki demokratik mühit hər zaman imkan verib ki, fərqli düşüncədə olan siyasi qüvvələr bir-biri ilə nomal münasibətlər qursunlar və həmin münasibətlərin formalaşmasında hansısa əngəl, problem yaranmasın. Amma nə təəssüf, əvvəllər bu həmrəyliyin yaranması üçün çaba göstərməsi gərəkən bəzi məmurlar, daha dəqiq desəm: məlum sahəyə məsul bəzi səlahiyyətlilər yerlərində olmayıblar. Onlar ya bilərəkdən, ya da səhlənkarlıqları ucbatından məsələni qəlizləşdiriblər və..eyniadlı səbəbdən də siyasi dialoqla bağlı uzun illər boyunca ciddi nəticələr əldə etmək mümkünsüzə çevirilib.
İndi isə vəziyyət tam fərqlidir. Siyasi konfiqurasiya dəyişikliiyindən sonra vəziyyət həqiqətən çox dəyişib. Təbii, yaxşıya doğru. Və artıq siyasi seqmentin bütün kəsimləri bir tək Qarabağ mövzusunda deyil, bütün milli məsələlərdə bir-biri ilə dil tapa bilir, əl-ələ verib dövlət maraqlarından çıxış edir, həmrəylik nümayiş etdirir.
Mən ən sonda Prezident Administrasiyasının “Siyasi partiyalar və qanunvericilik hakimiyyəti ilə əlaqələr” şöbəsinin bütün kollektivinə öz minnətdarlığımı bildirmək istəyirəm. Çünki bizim Qarabağa, işğaldan azad olunmuş ərazilərə birgə səfərlərimiz məhz onların təşəbbüsü, ideyasıdır. Eyni zamanda siyasi sistemin vacib elementi olan dialoq ənənəsinin formalaşmasında, siyasi partiyalar arasındakı münasibətlərin müsbət dinamikalı inkişafında hörmətli Ədalət müəllim başda olmaqla bütün şöbənin zəhməti gerçəkdən çox böyük və danılmazdır.” – deyə Partiya sədri fikirlərinə davam edib.
