“Təhsil olmadan innovasiyanın olması sual altında qalar. Təhsil sisteminin nailiyyətləri uzunmüddətli vaxtda innovasiyasının inkişafına təkan verir”.
“Qafqazinfo” xəbər verir ki, bunu Təhsilin İnkişafı Forumunda elm və təhsil naziri Emin Əmrullayev deyib.
O bildirib ki, təhsil sahəsində qısa müddətdə uğur əldə etmək çətindir: “İnsan zamanla yetişir, onları zamandan sürətli yetişdirmək metodu isə yoxdur. Təhsildəki nailiyyətləri əldə etməyə zaman lazımdırsa, qısa və səmərəli yollarla nələri həll edə bilərik sualına cavab tapmaq lazımdır. İnnovativ yanaşmalar məktəb vaxtlarından daha çox bağça yaşlarından başlamalıdır. Qısa yol isə ali təhsil müəssisələri ilə əlaqəlidir. Odur ki, bu işdə tədqiqat məsələsi vacibdir. Yeni bilik yaratmaq və idarə etmək isə başqa mövzudur”.
Nazir qeyd edib ki, hər il ölkədə 55 minə yaxın şəxs bakalavr, 10 min nəfər isə magistr təhsil alır: “Yaxın gələcəkdə bu rəqəmlər bir az da artacaq. Ali təhsil müəssisələrində innovasiya sistemi vacib elementlərdir. İş axtaranların iş yaradan keçidi burada önəmlidir. Universitetlərin bu proseslə inkişaf arasında ciddi əlaqə var”.
E. Əmrullayev əlavə olaraq bildirib ki, Azərbaycanda demək olar, təhsil dövlətin tənzimləndiyi sahədir: “İnnovasiya ekosistemində özəl sektorun böyük rolu var. Çünki bu işdə əsas mənfəətdir. İstər ixrac, istərsə daxili xərc optimallaşdırılması özəl sektorun payına düşür. İnnovasiya elə sahədir ki, bir qurum, yaxud bir insan bunu tək edə bilməz. Mütləq əməkdaşlıq olmalıdır”.
