Bu gün, qloballaşan dünyada xalqlar arasında qarşılıqlı anlaşma və əməkdaşlıq getdikcə daha da önəm qazanır. Müxtəlif xalqların mədəniyyətinə aid tədbirlərin keçirilməsi bu baxımdan xüsusi əhəmiyyət daşıyır. Belə tədbirlər, yalnız əyləncə məqsədi daşımır, eyni zamanda insanlar arasında mədəni körpülər yaradır və cəmiyyətlər arasında qarşılıqlı hörməti gücləndirir. Bu tədbirlər vasitəsilə insanlar başqa xalqların adət-ənənələri, musiqisi, rəqsləri, geyimləri və yeməkləri ilə tanış olur. Bu da öz növbəsində, mədəni müxtəlifliyi qəbul etməyə və tolerantlıq ruhunda böyüməyə, inkişaf etməyə kömək edir. Xüsusilə də, gənc nəsil üçün bu cür tədbirlər maarifləndirici rol oynayır ki, atılan belə addımlar nəticəsində onların dünyagörüşünü genişləndirir və milli kimliyə hörmətlə yanaşmağı öyrədir. Bundan əlavə, mədəniyyət tədbirləri turizmə və iqtisadi inkişaf sahələrinə də müsbət təsir göstərir. Mədəni müxtəlifliyin təbliği, həm də, beynəlxalq əməkdaşlığa və sülhə xidmət edir. Nəticə etibarilə, müxtəlif xalqların mədəniyyətinə aid tədbirlərin keçirilməsi cəmiyyətin inkişafı, qarşılıqlı anlaşma və multikultural dəyərlərin möhkəmlənməsi baxımından çox böyük əhəmiyyətə malikdir.
Elə bu məqsədlə də, 13.05.2025-ci il tarixində Beyləqan rayonu, Yunis Quliyev adına Bünyadlı kənd tam orta məktəbin ibtidai sinif müəllimi Aytac Tapdıqova, “Müxtəlif xalqların mədəniyyəti” adlı tədbir keçirmişdir. Tədbirdə məktəbin direktoru Bakir Nəsibov, dərs hissə müdiri Mirəhməd Mirhəşimov, eləcə də, müəllimlər, valideynlər və şagirdlər iştirak etmişdilər. Tədbirdə 3 b sinif şagirdləri, həm Azərbaycan mədəniyyətinə, həm də, Hindistan, Gürcüstan, Türkiyə və İtaliya mədəniyyətlərinə aid müxtəlif mahnılar, rəqslər, videoçarxlar təqdim etmişdilər. Azərbaycan rəqs mədəniyyətinin ən gözəl incilərindən biri olan “Uzundərə” rəqsi Mələkxanım Nəsirova tərəfindən ifa olunmuşdur. Milli musiqi alətimiz olan qarmonda isə, Aqşin Əlizadə öz çıxışı ilə tədbirə rəng qatmışdır. Bundan əlavə isə, Rusiya, Yaponiya və Fransa mətbəxinə aid bir sıra yemək nümunələri də nümayiş olunmuşdur.
Sonda, sözügedən məktəbin direktoru Bakir Nəsibov, həmin tədbirin təşkilatçısı, öz istedadı, nümunəvi davranışı ilə seçilən gənc mütəxəssis, ibtidai sinif müəllimi Aytac Tapdıqovaya və şagirdlərə xüsusi təşəkkürünü bildirmiş, həmçinin, onlara həvəsləndirici hədiyyələr təqdim etmişdir. Bununla da, hər kəs tərəfindən maraq və alqışlarla qarşılanan tədbir yekunlaşmışdır.
