“Təhsildə İnkişaf və İnnovasiyalar üzrə IX Qrant Müsabiqəsi” çərçivəsində həyata keçirilən “Məktəblərdə Aikido Klubları” qrant layihəsi üzrə fəaliyyətlər uğurla davam etdirilir. Layihə 191 nömrəli tam orta məktəbin ibtidai sinif müəllimi Xuraman Babayeva tərəfindən icra olunur.
Layihənin əsas məqsədi məktəblilər arasında Aikido idman növünü təşviq etmək, onların özünümüdafiə bacarıqlarını inkişaf etdirmək, fiziki və psixoloji hazırlıqlarını gücləndirmək, eyni zamanda sağlam həyat tərzinin formalaşmasına töhfə verməkdir.
Layihə çərçivəsində yaradılmış Aikido klubunun üzvləri mütəmadi olaraq nəzəri və praktiki təlimlərdə iştirak edirlər. Təlimlər zamanı şagirdlər Aikidonun əsas texnikaları və qaydaları ilə tanış olur, müxtəlif fiziki məşqlər vasitəsilə çeviklik, dözümlülük və koordinasiya bacarıqlarını inkişaf etdirirlər. Eyni zamanda dərslər şagirdlərdə intizam, özünənəzarət, məsuliyyət və komanda ruhu kimi mühüm keyfiyyətlərin formalaşmasına şərait yaradır.
Azərbaycan Aykido Federasiyasının peşəkar təlimçisi Qabil Qədiməliyevin rəhbərliyi ilə keçirilən təlimlər şagirdlərin həm fərdi inkişafına, həm də kollektiv fəaliyyət bacarıqlarının gücləndirilməsinə müsbət təsir göstərir. Ümumilikdə layihə çərçivəsində 3 ay ərzində 24 nəzəri və praktiki dərsin təşkili nəzərdə tutulur.
Layihənin davam edən mərhələsində iştirakçıların qazandıqları bilik və bacarıqları nümayiş etdirmələri məqsədilə məktəbdə Aikido Festivalının təşkili nəzərdə tutulur.
