Sentyabrın 10-da Lerik Rayon Mədəniyyət Mərkəzində Azərbaycan Respublikası Milli Məclisinin deputatı Vasif Qafarovun və Lerik ziyalılarının birliyi olan Lerikin İnkişafına Dəstək Qrupunun təşəbbüsü ilə 2026-2027-ci tədris ili üçün Azərbaycan Respublikasının ali təhsil müəssisələrinə qəbul imtahanlarında yüksək bal toplayaraq ali məktəblərə qəbul olunan Lerik rayonundan olan gənclərlə və 2025-2026-cı tədris ilində rayonda fəaliyyət göstərən təhsil müəssisələrində ümumi orta təhsil pilləsini bitirən və buraxılış imtahanlarında yüksək nəticə əldə edən şagirdlərlə görüş keçirilib.
Tədbirdən əvvəl iştirakçılar Azərbaycan xalqının Ümummilli Lideri Heydər Əliyevin Lerik şəhərindəki abidəsini ziyarət edib, önünə gül dəstələri qoyublar.
Ulu Öndər Heydər Əliyevin və Azərbaycan Respublikasının ərazi bütövlüyü uğrunda həlak olan şəhidlərin əziz xatirəsi bir dəqiqəlik sükutla yad edilib.
Görüşdə Azərbaycan Respublikası Milli Məclisinin deputatı Vasif Qafarov, Lerik Rayon İcra Hakimiyyəti başçısının müavini – Ərazi-təşkilat və ictimai-siyasi məsələlər şöbəsinin müdiri Arzu Vəliməmmədova, Lerik Rayon Təhsil Sektorunun müdiri Ülviyyə Əliyeva, rayonun bir sıra ümumtəhsil məktəblərinin direktorları, müəllimlər, valideynlər və Lerikin İnkişafına Dəstək Qrupunun üzvləri iştirak edib. Qəbul imtahanlarında yüksək bal toplayaraq tələbə adını qazanan məzunlar, buraxılış imtahanında yüksək nəticə göstərən şagirdlər və gənc nəslin yetişdirilməsində nümunəvi xidmətləri olan yüksək göstəricilərə malik müəllimlər Lerikin İnkişafına Dəstək Qrupu tərəfindən mükafatlandırılıb.
