“Azərbaycan Respublikasının Prezidenti İlham Əliyevin “Konstitusiya və Suverenlik İli” münasibətilə amnistiya elan olunması təşəbbüsü dövlətin humanist siyasətinin bariz nümunəsi kimi cəmiyyət tərəfindən yüksək dəyərləndirilir. Bu təşəbbüs təkcə hüquqi qərar deyil, eyni zamanda mərhəmət, ədalət və vətəndaş mərkəzli idarəetmənin təzahürüdür”.
Bunu Avrasiya.net-ə açıqlamasında Milli Məclisin deputatı Şahin İsmayılov deyib.
Deputat bildirib ki, Azərbaycanın müstəqillik dövründə indiyədək 70-ə yaxın əfv sərəncamı və 12-yə qədər amnistiya qərarı qəbul edilib: “Bu fakt ölkəmizdə insan hüquq və azadlıqlarının təminatına, cəza siyasətinin humanistləşdirilməsinə verilən önəmin göstəricisidir. Əfv və amnistiya institutları cəmiyyətin dövlətə və ədalətə inamını möhkəmləndirən, sosial ədaləti gücləndirən mühüm mexanizmlər kimi çıxış edir.
Xalqımızın Ümummilli Lideri Heydər Əliyevin siyasi iradəsi və xilaskarlıq missiyası sayəsində müstəqil Azərbaycan dövləti qurulub möhkəmlənmiş, onun rəhbərliyi ilə qəbul edilmiş Azərbaycan Respublikasının Konstitusiyası müasir dövlətçiliyimizin hüquqi təməlini yaratmışdır. Ulu Öndərin müəyyənləşdirdiyi humanizm və hüquqi dövlət quruculuğu kursu bu gün də uğurla davam etdirilir.
Ulu Öndərin siyasi kursunun layiqli davamçısı, Azərbaycan Respublikasının Prezidenti, Müzəffər Ali Baş Komandan İlham Əliyevin qətiyyətli və uzaqgörən strategiyası, sarsılmaz liderliyi və Silahlı Qüvvələrimizin misilsiz qəhrəmanlığı sayəsində Vətən müharibəsində qazanılan Zəfər və 2023-cü il sentyabrın 19–20-də həyata keçirilmiş lokal xarakterli antiterror əməliyyatı nəticəsində ölkəmizin suverenliyi və ərazi bütövlüyü tam bərpa edilmişdir.
Suverenliyimizin bərpası, Konstitusiyamızın ali hüquqi qüvvəsinin ölkəmizin bütün ərazilərində təmin olunması xalqımızın ən böyük tarixi qələbələrindən biridir. Məhz bu tarixi nailiyyətlər fonunda irəli sürülən amnistiya təşəbbüsü həm rəmzi, həm də ictimai-siyasi baxımdan xüsusi əhəmiyyət daşıyır”.
Deputat əlavə edib ki, humanizm və mərhəmət ənənələrinə sadiq qalaraq, cəzadan azad etmənin tərbiyəvi əhəmiyyətinə inanaraq və cəzadan azad ediləcək şəxslərin gələcəkdə qanunlara əməl edəcəklərinə, dövlətimizin inkişafına töhfə verəcəklərinə ümid edərək Prezident İlham Əliyev amnistiya elan edilməsi təşəbbüsü ilə çıxış edib:
“Amnistiya aktının layihəsinə əsasən, Azərbaycanın suverenliyinin və ərazi bütövlüyünün qorunması uğrunda aparılan döyüş əməliyyatlarında, o cümlədən Vətən müharibəsində və 2023-cü ilin antiterror əməliyyatlarında iştirak etmiş şəxslər, həmin əməliyyatlarda həlak olmuş və ya itkin düşmüş şəxslərin yaxın qohumları, Ermənistanın hərbi təxribatları nəticəsində əlil olmuş şəxslər, eləcə də qadınlar, 60 yaşına çatmış şəxslər, cinayət törədərkən yetkinlik yaşına çatmayanlar və digər kateqoriyalar amnistiyanın əhatə dairəsinə daxil edilir.
Bununla yanaşı, böyük ictimai təhlükə törətməyən, az ağır və ehtiyatsızlıqdan törədilmiş cinayətlərə görə azadlıqdan məhrumetmə cəzasına məhkum olunmuş bir sıra şəxslərin cəzadan azad edilməsi və ya cəzalarının çəkilməmiş hissəsinin azaldılması nəzərdə tutulur.
Prezident tərəfindən Milli Məclisə təqdim edilən amnistiya aktının tətbiq olunacağı şəxslərin sayına görə ölkə tarixində ən genişmiqyaslı amnistiyalardan biri olacağı ehtimal edilir. Gözləntilərə görə, bu humanist qərar ümumilikdə 20 mindən çox şəxsə şamil edilə bilər.
Bu, dövlətin cəza siyasətində humanizmin, mərhəmətin və sosial ədalətin təntənəsi kimi qiymətləndirilir.
Demokratik dəyərlərin əsas meyarlarından olan insan hüquq və azadlıqlarının müdafiəsinə böyük önəm verən Azərbaycan dövləti cəmiyyətdə humanizm ənənələrinin formalaşmasına və möhkəmlənməsinə hər zaman xüsusi həssaslıqla yanaşıb. Amnistiya və əfv aktları yüzlərlə, minlərlə insana həyatında yeni səhifə açmaq, cəmiyyətə yenidən inteqrasiya olunmaq imkanı yaradır.
Bu addımlar respublikamızın humanizm prinsipləri əsasında inkişaf yolunu seçdiyini bir daha nümayiş etdirir, xalqın dövlətə və ədalət sisteminə inamını daha da gücləndirir.
Ulu Öndər Heydər Əliyevin təməlini qoyduğu humanizm ənənələrini uğurla davam etdirən Prezident İlham Əliyev mərhəmət və insanpərvərlik kimi ali dəyərləri daim rəhbər tutur. Bayramlar və əlamətdar tarixi günlər ərəfəsində imzalanan əfv sərəncamları, irəli sürülən amnistiya təşəbbüsləri bu siyasətin ardıcıllığını təsdiqləyir.
Dövlət başçısının məqsədi törətdiyi əməldən səmimi peşman olan şəxslərin islah edilərək cəmiyyətə faydalı vətəndaş kimi qayıtması, azadlığa çıxdıqdan sonra bir daha cinayət törətməməsi üçün zəruri sosial-hüquqi mühitin formalaşdırılmasıdır.
Bütün bunlar bir daha sübut edir ki, Prezident İlham Əliyevin rəhbərliyi altında Azərbaycan vətəndaş mərkəzli, humanist və davamlı inkişaf yolunda inamla irəliləyir”.
