Elm və Təhsil Nazirliyinin Kataliz və Qeyri–üzvi Kimya Institutunda Elmi şuranın iclası olub.
İclasın gündəliyinə müəssisənin 2023-cü ilin birinci yarısında aparılan elmi-tədqiqat işlərinin hesabatına hazırlıq, elmlər doktorluğu hazırlığı üzrə doktorantura və dissertanturaya qəbul, doktorluq minimum imtahan proqramlarının təsdiqi və s. məsələlər daxil edilib.
İnformasiya.az xəbər verir ki, bu barədə AZƏRTAC-a institutdan məlumat verilib.
İnstitutun baş direktoru akademik Dilqəm Tağıyev bildirib ki, iqtisadi tutumlu perspektivli innovativ elmi–tədqiqat işlərinin genişləndirilməsi və səmərəliliyinin artırılması əsas hədəflərdən biridir. Bu baxımdan elmi-tədqiqat işlərinin səmərəliliyi artırılmalı, gənc kadrların potensialından geniş istifadə olunmalıdır.
Akademik qeyd edib ki, beynəlxalq bazalarda indeksləşən jurnallarda nəşr olunan elmi məqalələrə görə institutun fəaliyyəti qənaətbəxşdir. Belə ki, ötən ay “National H-index Ranking” tərəfindən 2023-cü ilin ikinci rübünün elmi nəticələri əsasında Azərbaycanda fəaliyyət göstərən elmi qurumların və universitetlərin Hirş indeksinə (H-index) görə reytinq sıralaması – “Azeri National H-index Ranking-2023” açıqlanıb. “Web of Science”, “Scopus” və “Google Scholar” göstəriciləri əsasında hesablanmış Hirş indeksinə (H-index) görə, Azərbaycanın 83 elmi təşkilatının və universitetinin elmi fəaliyyəti analiz edilib, institut bu siyahıda ilk onluqda qərarlaşıb. Lakin institutun mövcud potensialını nəzərə alsaq, bu istiqamətdə uğurları daha da artırmaq mümkündür.
D.Tağıyev Azərbaycan Prezidenti İlham Əliyev tərəfindən 2023-cü ilin ölkəmizdə “Heydər Əliyev İli” elan edilməsinin əhəmiyyətini vurğulayıb. O, “Heydər Əliyev İli” çərçivəsində institutda müxtəlif tədbirlərin keçirildiyini söyləyib. Qeyd edilib ki, həmin tədbirlərin davamı olaraq noyabr ayında gənc alimlər arasında Ulu Öndər Heydər Əliyevin 100 illik yubileyinə həsr olunan müsabiqə keçiriləcək.
Sonra digər məsələlər müzakirə edilib və müvafiq qərarlar qəbul olunub.
