Füzulidən çıxanda 11 yaşım var idi, balaca məktəbli idim. Uşaq olsam da, hər şeyi xatırlayıram. O günlər yadıma düşəndə, Füzulidən danışanda həmişə qəhər məni boğurdu. Xatırlayıram, qızlarla bulaq başına gedərdik, – xına daşı deyirdilər biz tərəfdə, – xına otunu o daşın üstündə hazırlayıb, əlimizə xına qoyurduq. Çox gözəl günlər idi. Allah bu günləri bizə çox görməsin.
AZƏRTAC xəbər verir ki, bu sözləri Füzuli şəhərinə qayıdan keçmiş məcburi köçkün Aidə Zülfüqarova deyib.
Uşaqlığını, xatirələrini qoyub gəldiyi el-obasına qayıtmağın sevincini yaşayan Füzuli sakini əlavə edib: “Bu günləri bizə yaşatdığı üçün Müzəffər Ali Baş Komandanımıza, şanlı Ordumuza minnətdarıq. Allah şəhidlərimizə rəhmət eləsin, qazilərimizə cansağlığı versin. Doğma yurdumda – Füzulimdə hər şey daha gözəl olacaq”.
Qeyd edək ki, bu gün növbəti köç karvanı Füzuli şəhərinə yola salınıb. Daha 30 ailə (125 nəfər) öz doğma yurduna köçürülüb. Bununla da ümumilikdə 470 ailənin (1750 nəfər) Füzuli şəhərində məskunlaşması təmin edilib.
