Dövlət suverenliyi hər bir xalqın azadlıq iradəsinin, tarixi mübarizəsinin və gələcək inkişafının əsasıdır. Azərbaycan xalqı əsrlər boyu öz torpaqlarında dövlətçilik ənənələrini qoruyub saxlamış, müstəqilliyini bərpa etdikdən sonra isə onu möhkəmləndirmək üçün misilsiz fədakarlıqlar göstərmişdir. Bu yolun ən mühüm mərhələlərindən biri isə 2023-cü il sentyabrın 20-də tam şəkildə təmin olunmuş dövlət suverenliyimizdir. Məhz elə həmin gün Azərbaycan ərazisində qanunun aliliyi tam bərpa olunaraq, ölkəmizin müstəqillik tarixinə qızıl hərflərlə yazılmışdır.
Azərbaycanın suverenliyi uğrunda aparılan mübarizə Birinci Qarabağ müharibəsindən başlamış, 44 günlük Vətən müharibəsi ilə tarixi Zəfərlə nəticələnmiş və nəhayət, 2023-cü il antiterror əməliyyatı ilə tam şəkildə təmin edilmişdir. Cəmi 23 saat davam edən həmin əməliyyat nəticəsində ölkəmizin konstitusiya quruluşu bərpa olunmuş, qanunsuz silahlı birləşmələr tərksilah edilmiş və dövlətin hüquqi-inzibati nəzarəti bütün ərazilərdə bərqərar edilmişdir. Bu hadisə təkcə hərbi uğur deyil, həmçinin hüquqi, siyasi və tarixi qələbədir.
Prezident İlham Əliyevin 2024-cü il 19 sentyabr tarixli sərəncamı ilə hər il sentyabrın 20-si “Dövlət Suverenliyi Günü” kimi qeyd olunur. Bu qərar yalnız tarixi hadisənin rəsmiləşdirilməsi deyil, həm də gələcək nəsillərə vətənpərvərlik, milli qürur və dövlətçilik ənənələrinin ötürülməsi baxımından əvəzsiz əhəmiyyət daşıyır. Dövlət Suverenliyi Günü Azərbaycan xalqının öz müqəddəratını həll etmək, torpaqlarının hər qarışında dövlət rəmzlərini ucalmaq iradəsinin təntənəsidir.
Bu gün Azərbaycanın bayrağı işğaldan azad edilmiş torpaqlarımızda qürurla dalğalanır. Qəhrəman şəhidlərimizin qanı bahasına əldə edilən bu nailiyyət dövlətimizin mövcudluğunu möhkəmləndirməklə yanaşı, xalqımızın milli birliyinin, əzm və iradəsinin də simvoluna çevrilmişdir.
Suveren dövlət – beynəlxalq hüquqda ali hakimiyyəti təmsil edən, öz dövlətinin daxili və xarici siyasətində tamamilə müstəqil olan, başqa dövlətin hakimiyyətindən asılı olmayan və hansısa bir coğrafi ərazidə suverenliyi olan dövlət deməkdir. Özünün siyasi, mədəni tarixinə, taleyinə sahib çıxmaq, müstəqil dövlətini yaradaraq inkişaf etdirmək hər xalqa nəsib olmur. Suverenlik dövlətin əsas xüsusiyyəti hesab edilmiş və dövlətin üstün və qeyri-məhdud səlahiyyətə malik olduğu güman edilmişdir. Beynəlxalq hüquq suveren dövlətləri daimi əhaliyə sahib olmaqla, müəyyən bir ərazisi olmaqla, ali və tək hökuməti olmaqla və digər suveren dövlətlərlə münasibət qurmağa gücü olmaqla xarakterizə edir. Həmçinin, suveren dövlət başqa bir dövlətdən nə asılı, nə də tabe olmamalıdır. Beynəlxalq hüququn normalarını, BMT nizamnaməsinin tələblərini kobud şəkildə pozaraq Azərbaycana qarşı təcavüzkar siyasət həyata keçirən Ermənistan hərbi gücdən istifadə edərək ölkəmizin beynəlxalq səviyyədə tanınmış ərazilərini 30 ildən çox işğal altında saxladı, azərbaycanlılara qarşı etnik təmizləmə apardı, törətdiyi hərbi cinayətlərlə şəhər və kəndlərimizi viran, ölkəmizin təbii resurslarını talan etdi, tarixi, dini, mədəni abidələrini dağıtdı, Azərbaycan xalqına qarşı Xocalı soyqırımı törətdi. Bütün bu problemlərə baxmayaraq bu ərazilər suveren Azərbaycan ərazisi olaraq tanınırdı. Ermənistanın hərbi təcavüz və işğalının nəticələrinin aradan qaldırılması və BMT Təhlükəsizlik Şurasının 822, 853, 874 və 884 saylı qətnamələrinin həyata keçirilməsi üzrə 30 ilə yaxın davam edən danışıqlar uğursuzluqla nəticələndi. Ermənistanın 2020-ci il sentyabrın 27-də başlatdığı II Qarabağ müharibəsində iddiaları böyük idi. Ermənistanın yeni işğalçılıq planlarına, növbəti hərbi təcavüz cəhdinə və ardıcıl təxribatlarına Azərbaycanın verdiyi cavab nəticəsində 44 gün davam edən müharibədə Azərbaycan Silahlı Qüvvələri Ermənistan ordusunu darmadağın etdi və tarixi Zəfər qazandı. Müharibə nəticəsində işğal altındakı ərazilərinin böyük bir hissəsi azad edildi, Kəlbəcər, Ağdam və Laçın rayonlarında yerləşən Ermənistan silahlı qüvvələri isə həmin ilin sonuna qədər ərazidən çəkildilər. Bununla da torpaqlarını 30 illik işğaldan azad edən Azərbaycan BMT Təhlükəsizlik Şurasının qətnamələrini özü yerinə yetirdi.
Müşfiq Səfərov,
Yeni Azərbaycan Partiyası Beyləqan rayon təşkilatının sədri
