Məlumat üçün bildiririk ki, “Dayanıqlı İnkişaf Uğrunda” Gənclərin İctimai Birliyi Azərbaycan Respublikasının Gənclər Fondunun 18-ci qrant müsabiqəsinin “Dayanıqlı inkişaf naminə “Green Genius Academy” adlı layihənin qalibi olmuşdur.
Layihənin əsas məqsədi gəncləri davamlı inkişaf prinsiplərinə uyğun fəaliyyətlərə cəlb etmək, onların bu sahədə biliklərini artırmaq və daha dayanıqlı bir cəmiyyətin qurulması istiqamətində maarifləndirməkdir. Layihə, xüsusilə bərpa olunan enerji, ekoloji məsuliyyət və dayanıqlı iqtisadiyyat mövzularına diqqət yetirərək gəncləri bu sahələrdə aktiv iştirakçıya çevirmək məqsədi daşıyır.
Layihə çərçivəsində İsmayıllı və Şamaxı rayonlarında 4 təlim uğurla həyata keçirilib. Təlimlər zamanı gənclərə davamlı inkişaf məqsədlərinin əhəmiyyəti, ətraf mühitin qorunması və qida təhlükəsizliyi ilə bağlı məsələlər barədə ətraflı məlumat təqdim olunub. Layihənin rəhbəri və eyni zamanda Qida Təhlükəsizliyi Hərəkatının rəhbəri Məhsəti Hüseynova bu sessiyalarda gənclərlə bilik və təcrübəsini bölüşüb.
Məhsəti Hüseynova çıxışında qeyd edib ki, bərpa olunan enerji mənbələrinin tətbiqi, tullantıların idarə olunması və ekologiyanın qorunması kimi mövzular yalnız bir ölkənin deyil, bütün dünyanın aktual problemləridir. Gənclərin bu istiqamətdə bilikləndirilməsi isə həm ölkəmizin, həm də dünyanın daha dayanıqlı gələcəyinə töhfə verəcəkdir.
“Green Genius Academy” layihəsi gələcəkdə də davamlı inkişaf prinsiplərinin genişləndirilməsi və gənclər arasında maarifləndirici tədbirlərin artırılması məqsədilə fəaliyyətini davam etdirəcək. Layihə, həmçinin, iştirakçı gənclərin ekoloji məsələlərə daha həssas yanaşmasına və bu sahədə aktiv təşəbbüslər irəli sürməsinə dəstək olmaq niyyətindədir.
