Hazırda iki ölkə arasında əlaqələr strateji müttəfiqlik səviyyəsindədir. Bölgədə yeni reallıqlar formalaşıb və Azərbaycan bu yeni reallığın möhkəmləndirilməsi üçün addımlar atır.
Azərbaycan ilə Gürcüstan arasında sarsılmaz dostluq və qardaşlıq əlaqələrinin tarixi çox qədimdir. Bu münasibətlər zəngin ənənələr üzərində qurulub. Əsrlər boyu xalqlarımız dostluq, qardaşlıq, mehriban qonşuluq şəraitində yaşamışlar. Dövlətlərarası əlaqələr də bu möhkəm təməl üzərində inkişaf edir.
Parlament seçkilərindən sonra Gürcüstanın Baş naziri İrakli Kobaxidzenin ilk səfərini Azərbaycana həyata keçirməsi, təbii ki, Gürcüstan-Azərbaycan əlaqələrinin nə qədər yüksək səviyyədə olmasından xəbər verir. Səfərin məqsədi ölkələrimiz arasında yüksək səviyyədə olan əlaqələrin daha da inkişafına və qarşılıqlı maraq doğuran sahələrdə əməkdaşlığın gücləndirilməsinə töhfə verməkdir.
Baş nazir İrakli Kobaxidzenin ölkəmizə gəlməsi, cənab Prezidentlə görüşməsi və səsləndirdiyi fikirlər vacib əhəmiyyətə malikdir. Çıxışı zamanı Prezident İlham Əliyevin siyasi liderliyinin bütün dünyaya səs saldığını səsləndirən baş nazir, ilk səfərlərini məhz Azərbaycana etmələrindən məmnun olduğunu bildirdi. Bu gün Azərbaycan faydalı əməkdaşlığa əsaslanaraq qonşu dövlətlərlə münasibətlərini daha da inkişaf etdirməyə nail olub. Bu baxımdan, Azərbaycan-Gürcüstan münasibətləri xüsusi vurğulanmalıdır.
Gürcüstanla Azərbaycanı biri-birlərinə daha sıx tellərlə bağlayan eyni zamanda, qlobal enerji və nəqliyyat layihələridir: İkitərəfli layihələr təkcə iki ölkə və region üçün deyil, ümumilikdə Avropa üçün önəmlidir.
Bu səfər Azərbaycanla Gürcüstan arasında daşınma və loqistika sahəsində əməkdaşlığın daha da dərinləşəcəyini, hər iki ölkənin tranzit potensiallarının əhəmiyyətli dərəcədə artacağını və Avrasiyanın təkcə enerji deyil, nəqliyyat təhlükəsizliyində əvvəlkindən qat-qat böyük rol oynayacaqlarını ortaya qoydu. Bu dost ölkə ilə birgə reallaşdıracağımız “Yaşıl enerji dəhlizi” isə hər iki ölkəyə böyük gəlirlər vəd etməklə yanaşı, geosiyasi çəkilərini də yetərincə artırır.
Azərbaycan Gürcüstan üçün əsas iqtisadi baxımdam böyük önəm daşıyır. Azərbaycanın investisiyası olmasaydı, Gürcüstanın iqtisadi problemləri çox olardı. Hər iki ölkə arasında qarşılıqlı əlaqələrin yaxın illərdə daha sürətlə inkişaf edəcəyini ehtimal edə bilərik.
Qeyd edək ki, Azərbaycan-Gürcüstan münasibətləri daim yüksək səviyyədə olub. Ölkələrimizin parlamentlərarası əlaqələri də fəal şəkildə davam etdirilir. Hər iki ölkənin qanunverici orqanında dostluq və işçi qrupları fəaliyyət göstərir.
Həmçinin humanitar sahədə əməkdaşlığı da xüsusi vurğulamaq lazımdır. Heydər Əliyev Fondu tərəfindən Gürcüstanda bir çox layihələr həyata keçirilib. Bütün bunlar sübut edir ki, ölkələrimizi mehriban qonşuluq və tarixi dostluq əlaqələri, siyasi, iqtisadi, humanitar və digər sahələrdə strateji tərəfdaşlıq əlaqələri birləşdirir.
Azərbaycanla Gürcüstan arasında uğurlu regional əməkdaşlıq münasibətləri çərçivədə irimiqyaslı qlobal enerji və nəqliyyat-kommunikasiya layihələrinin reallaşdırılması regional sülhə və sabitliyə xidmət edir.
Milli Məclisin deputatı Ceyhun Məmmədov
