Prezident İlham Əliyevin Donald Trampın dəvəti ilə Birləşmiş Ştatlara səfəri, Cənubi Qafqazda sülhün və sabitliyin təmin olunması istiqamətində mühüm diplomatik hadisə kimi qiymətləndirilə bilər.
Azərbaycan hər zaman olduğu kimi, bu gün də həm regionda, həm də beynəlxalq müstəvidə sülhün və davamlı inkişafın tərəfdarı kimi çıxış edir. Görüşün əsas prioriteti Cənubi Qafqazda uzunmüddətli sülhün bərqərar olunması və Azərbaycan-Ermənistan münasibətlərinin normallaşdırılması məsələləri ola bilər.
Prezident İlham Əliyev bu müzakirələrdə qalib lider, regional təhlükəsizliyin təminatçısı və sabitliyin başlıca qarantı kimi çıxış edərək Azərbaycanın prinsipial və ardıcıl mövqeyini bir daha nümayiş etdirəcək.
Bu səfər sübut edir ki, Azərbaycan artıq təkcə Cənubi Qafqazın deyil, bütövlükdə regionun söz sahibi olan güc mərkəzlərindən birinə çevrilib. Güclü siyasi iradə, çevik diplomatiya və milli maraqlara əsaslanan liderlik ölkəmizin qlobal miqyasda nüfuzunu daim artırmaqdadır.
