Hər bir insanın istər adi vətəndaş olsun, istərsə də ölkə rəhbərinin ailə üzvü şəxsi həyatı toxunulmazdır. Bu prinsip bütün hüquqi dövlətlərdə qəbul olunmuş qırmızı xətdir. Bu xətti aşanlar cəmiyyətin gözündə heç vaxt qəhrəman ola bilməzlər. Əksinə, belə davranışlar nifrət və ikrah doğurur.
Bu sözləri Milli Cəbhə Partiyasının (MCP) sədr müavini Ehtiram Mehtiyev sosial şəbəkə hesabında yazıb:
“Son günlər xaricdə məskunlaşmış, özlərini “mühacir bloger” kimi təqdim edən bəzi ünsürlərin Azərbaycan dövlətini və onun atributlarını hədəf alan çirkin kampaniyalarına şahidlik edirik. Bu şəxslər sosial şəbəkələrdə saxta, montaj olunmuş videolar yaymaqla cəmiyyətdə nifrət toxumu səpməyə, şantaj və böhtan yolu ilə təhqiramiz çağırışlar etməyə çalışırlar.
Bu cür davranış nə söz azadlığıdır, nə də mübarizə metodu. Bu açıq-aşkar mənəvi dəyərlərdən uzaqlaşmanın və şəxsi məsuliyyətsizliyin göstəricisidir. Xüsusilə Azərbaycan qadınına və ailə institutuna qarşı dil uzadan, böhtan atan şəxslər əslində öz ailə dəyərlərinə hörmət etməyən, mənəvi boşluq içində olan insanlardır. Aparılan bu çirkin hücumlar mahiyyət etibarilə Azərbaycan dövlətinə, onun milli dəyərlərinə qarşı yönəlmiş məqsədli informasiya təxribatıdır. Bu şəxslər saxta videolar və şər-böhtan vasitəsilə cəmiyyətdə süni maraq yaratdıqlarını düşünürlər. Reallıq isə tam əksini göstərir Azərbaycan cəmiyyəti bu cür məkrli və ucuz fəaliyyətləri qətiyyətlə rədd edir.
Ölkədən kənarda oturaraq nifrət dili ilə danışmaq, ailə üzərindən şantaj qurmaq nə cəsarətdir, nə də mübarizə. Bu sadəcə nankorluğun və mənəvi boşluğun bariz nümunəsidir. Azərbaycan dövləti və xalqı bu cür provokasiyalar qarşısında hər zaman ayıq-sayıq olub və bundan sonra da olacaq”
