Azərbaycan Somali münasibətləri iqtisadi potensiala, iqtisadi perspektivə söykənən münasibətlərdir. Ümumiyyətlə Azərbaycan tək Somali deyil, Afrika ölkələrinə kifayət qədər Qoşulmama hərəkatı çərçivəsində, COP29, Bakı təşəbbüs qrupu çərçivəsində öz tövhələrini verib və Fransanın müstəmləkəçilik siyasətinə qarşı ədalətli olmağa çağırış edib ki, bu da xüsusilə də COP29-da Azərbaycanın çağırışları və sonda qəbul etdiyi qərarlarda öz əksini tapmışdır.
Qeyd etmək lazımdır ki, son vaxtlar biz cənab prezidentin rəhbərliyi ilə Azərbaycanın xarici siyasətində bir neçə xüsusi, vacib məqamı müşahidə edirik. Bunlardan biri xarici siyasətdə müsəlman ölkələri ilə əlaqələrin gücləndirilməsidir. Eyni zamanda yaxın şərqlə yanaşı Afrika dövlətləri ilə də əməkdaşlığın və əlaqələrin gücləndirilməsidir.
Bu gün Afrika böyük güclərin, müxtəlif dövlətlərin uğrunda mübarizə apardığı bir qitəyə çevrilib. Burada söhbət böyük təbii sərvətlərdən gedir.
Azərbaycan xarici siyasətinin əhatə dairəsini daha da genişləndirir. Təkcə Somali deyil, digər Afrika ölkələri ilə də əlaqələrimizin sürətli formada inkişafını görürük və yəqin ki, yaxın zamanlarda digər ölkələrlə də bu istiqamətdə əməkdaşlıq qurulacaq.
Bir məsələni də qeyd etmək lazımdır ki, ümumiyyətlə Azərbaycanın xarici siyasətində Türkiyə ilə bir koordinasiyalı addımlar var. Bunun özü də çox önəmlidir. Bu gün Türkiyə Somalidə böyük layihələr həyata keçirir.
Bu gün Azərbaycan dünyanın bəzi ölkələrinə investisiyalar yatırır. Bu gün bizim böyük potensialımız var.
Bizim ölkə ilə Somalinin ortaq problemləri də zamanında olub. Somali də bizim ölkə kimi daxili çəkişmələrdən əziyyət çəkib. Uzun müddət İtalya, Fransa, Böyük Britaniya tərəfindən bölünmələrə məruz qalıb. Bu gün bu ölkə artıq daxili təhlükəsizliyini təmin edə bildi.
Burada digər bir məsələ müstəqil siyasətin həyata keçirilməsidir. Bu gün biz bunu tam əminliklə deyə bilərik ki, Azərbaycan müsəlman ölkələrinin içərisində lider dövlətlərindən birinə çevrilib. Artıq Afrika dövlətləri Azərbaycanla əməkdaşlıq etməyə maraqlıdırlar. Artıq Azərbaycan güclü bir siyasət həyata keçirir. Balanslı siyasət xüsusi diqqət cəlb edir. Bu bizim mövqeyimizi Beynəlxalq təşkilatlar müstəvisində də daha da gücləndirir. Həm də biz müsəlman həmrəyliyinə öz tövhəmizi davamlı olaraq veririk.
Milli Məclisin deputatı Ceyhun Məmmədov
