İyulun 15-də Azərbaycan Həmkarlar İttifaqları Konfederasiyasının (AHİK) “Könüllülər proqramı”nın iştirakçıları Milli Məclisdə olublar.
Milli Məclisin inzibati binasında yerləşən “Heydər Əliyev adına xatirə zalı”nda könüllülərə Ümummilli Lider Heydər Əliyevin zəngin həyat yolu və çoxşaxəli siyasi fəaliyyəti barədə ətraflı məlumat verilib. Zalda nümayiş etdirilən eksponatlar və fotoşəkillər gənclərdə dərin təəssürat yaradıb. Həmçinin 44 günlük Vətən müharibəsində Müzəffər Ali Baş Komandan cənab İlham Əliyevin rəhbərliyi ilə qazanılan Qələbəyə həsr olunmuş “Zəfər guşəsi” ilə tanışlıq könüllülərdə qürur hissi yaradıb.
Sonra könüllülər Milli Məclisin Gənclər və idman komitəsinin sədri Şahin İsmayılov, deputatlar – Müşfiq Cəfərov və Mircəlil Qasımlı ilə görüşüblər. Millət vəkilləri parlamentin fəaliyyəti, qanun yaradıcılığı barədə ətraflı məlumat veriblər. Onlar gənclərə fəal olmağı, ölkənin ictimai-siyasi həyatında aktiv iştirak etməyi tövsiyə ediblər.
Görüş zamanı könüllülər ölkədə gənclərin inkişafı üçün yaradılmış geniş imkanları vurğulayıb, dövlət tərəfindən göstərilən diqqət və qayğının onları daha da təşəbbüskar olmağa ruhlandırdığını bildiriblər.
