2020-ci il noyabrın 20-si Ağdam şəhərinin və ətraf kəndlərin erməni işğalından azad edildiyi gün kimi tarixə yazıldı. Dövlətimizin başçısının 2023-cü il iyulun 31-də imzaladığı Sərəncama əsasən Ağdam şəhərinin işğaldan azad edildiyi 20 noyabr tarixi “Ağdam Şəhəri Günü” kimi qeyd olunur. 2020-ci ilin sentyabrın 27-də başlanan əks-hücum əməliyyatına düşmən cəmi 44 gün tab gətirə bildi. Hər gün ərazi bütövlüyümüzün bərpa olunduğu xəritə 44 gün ərzində tamamlandı. Otuz il ərzində ağır istehkamlar quran, özlərini qalib adlandıran və “yenilməzlik” donuna bürünən Ermənistan ordusunun uydurmaları 2020-ci ilin payızında Azərbaycan əsgərinin şücaəti sayəsində puça çıxdı. Ordumuz hər bir cəhətdən onlardan üstün idi. Əsas fərqimiz isə doğma torpaqlarımız naminə vuruşmağımız idi. Uzun illər öz sakinlərinə həsrət qalan, düşmən barbarlığının qurbanına çevrilən həmin torpaqlar xilas olacağı günü səbirsizliklə gözləyirdi. Biz haqqımız olanı 44 gün ərzində nəinki düşmənə, onun havadarlarına qarşı bütün cəbhələrdə döyüşərək aldıq. Xalq-ordu-iqtidar birliyi dəmir yumruq kimi qarşısındakı bütün maneələri əzə-əzə irəlilədi. Bu müqəddəs yolda canımızdan canlar getdi, ən dəyərlilərimizi qurban verdik, lakin amalımıza çatdıq: biz adımıza layiq Zəfər qazandıq. Biz tarixi missiyamızı 44 günə yekunlaşdırdıq. Düşmən dizlərini yerə qoyaraq kapitulyasiya aktına imza atmalı oldu. Nəticədə Ağdam, Kəlbəcər və Laçın rayonları bir güllə atılmadan azad edildi. Ağdam Şəhəri Günü, Azərbaycanın mədən-mənəvi dirçəlişinin bir simvolu olaraq, ölkənin tarixində yeni bir səhifə açır. Bu gün, yalnız Azərbaycan xalqı üçün deyil, bütün dünya üçün bir sülh və əmin-amanlıq mesajı daşıyır. Ağdamın bərpası və yenidən qurulması işləri, Azərbaycanın mədəni irsinin qorunması və inkişaf etdirilməsi istiqamətində mühüm addımlardır. Hal-hazırda Ağdam şəhəri yenidən qurulur, gözəlləşir və inanırıq ki, yaxın gələcəkdə Ağdam şəhərı tam abad və səliqəli şəhərlərdən biri olacaqdır.
Ağdamın bərpası həm mədəni, həm də iqtisadi baxımdan Azərbaycanın milli inkişaf strategiyasının bir hissəsidir. İlk növbədə, şəhərin qədim mədəni irsinin dirçəldilməsi prioritet hesab olunur. Ağdam məscidi, Qiyaslı məscidi, İmarət kompleksi kimi tarixi abidələr bərpa olunur. Bununla yanaşı, Ağdamın simvolik obyektlərindən biri olan Qarabağ xan sarayı da yenidən tikilərək şəhərin mədəni simasını bərpa etməyə xidmət edəcək. Eyni zamanda, Ağdam iqtisadi baxımdan da güclü inkişaf etdirilir. Ağdam Sənaye Parkı və Aqropark kimi layihələr, şəhərin iqtisadi həyatını dirçəltməklə yanaşı, iş yerlərinin yaradılmasına da şərait yaradır. Bu layihələr sayəsində Ağdam regionda mühüm iqtisadi mərkəzlərdən birinə çevriləcəkdir.
Ağdam həmçinin “ağıllı şəhər” konsepsiyası çərçivəsində müasir texnologiyalarla yenidən qurulur. Azərbaycan hökuməti bu konsepsiyanı icra etmək üçün qabaqcıl yerli və beynəlxalq şirkətlərlə əməkdaşlıq edir. Şəhər həm tarixi əhəmiyyətini qoruyacaq, həm də müasir texnologiyaların tətbiqi ilə gələcəyə yönəlmiş bir mərkəzə çevriləcək. Eyni zamanda, Ağdamın mədəni və turizm potensialını bərpa etmək üçün qədim abidələr və şəhərin simvolik məkanları da bərpa olunur. Ağdamın bərpası təkcə fiziki bir şəhərin yenidən qurulması deyil, həm də Azərbaycan xalqının milli qürurunun bərpası anlamını daşıyır. Ağdam yenidən öz mədəni və iqtisadi potensialı ilə regionda lider mövqeyini bərpa edəcək və Azərbaycan xalqının qələbə iradəsinin simvoluna çevriləcəkdir. Bu proses həm ölkə daxilində, həm də beynəlxalq səviyyədə böyük maraqla izlənilir. Ağdamın şöhrətinin bərpa olunması Azərbaycanın gələcəyə olan inamının və xalqın birliyinin təzahürüdü.
Ağdam Gününün qeyd edilməsi, yalnız bir şəhərin azad olunmasını təntənə etməklə məhdudlaşmır. Bu gün, həm də Azərbaycan xalqının gücünü, əzmini və iradəsini ifadə edir. 1993-cü ildə işğal altına düşən Ağdam, 27 illik əzab və həsrətin ardından, 2020-ci ildə Azərbaycan Ordusunun və xalqının birgə mübarizəsi nəticəsində azad edildi. Bu zəfər, yalnız hərbi sahədə deyil, həm də əzmkarlıq, mübarizə ruhu və vətənpərvərlik baxımından böyük bir simvol oldu. Ağdamın işğaldan azad edilməsi, Azərbaycanın ərazi bütövlüyünü bərpa etməsinin və xalqın azadlıq mübarizəsinin uğurlu nəticəsi idi.
Niyaməddin Əsgərov,
YAP Beyləqan rayon təşkilatının sədr müavini
