Bu gün — Xocalı soyqırımının ildönümündə xalqımız bir daha tariximizin ən ağrılı, eyni zamanda unudulmaz səhifəsini xatırlayır.
Ulu Öndər Heydər Əliyevin siyasi iradəsi nəticəsində Xocalı həqiqətləri ilk dəfə beynəlxalq müstəviyə çıxarıldı, bu faciəyə soyqırımı siyasi-hüquqi qiyməti verildi.
Prezident İlham Əliyevin rəhbərliyi ilə isə bu gün Azərbaycan həmin ədalətin bərpası istiqamətində böyük tarixi addımlar atmış, torpaqlarımızı azad etmiş, ədaləti bərpa etmiş bir dövlət kimi dünyaya öz haqq səsini çatdırır.
İki il əvvəl təməli qoyulan və bu gün Xocalıda ucaldılan Memorial Kompleks Azərbaycan xalqının yaddaşının, iradəsinin və əyilməz ruhunun rəmzidir.
Dünən Prezident İlham Əliyev ailəsi ilə birlikdə Xocalı Soyqırımı Memorialının açılışında iştirak etdi, sakinlərlə görüşdü, mühüm mesajlar verdi.
Azərbaycan xalqı tarix boyu bir çox soyqırımı aktlarına, qətliam və faciələrə məruz qalıb. Ancaq heç bir cəhd bu millətin iradəsini qıra, haqq yolundan döndərə bilmədi.
Bu gün dünyada yüzlərlə münaqişə var, ancaq onların heç biri tam həllini tapmayıb. Azərbaycan yeganə dövlətdir ki, torpaqlarını azad edib, qələbəsini tam təmin edib.
Prezident İlham Əliyevin çıxışında qeyd etdiyi kimi, revanşistlər anlamalıdırlar ki, bütün cəhdlərin qarşısı çox qətiyyətlə alınacaq. Bu gün Azərbaycan həmin Azərbaycan deyil. Heç kim Azərbaycanın səbrini sınağa çəkməsin.
Bu gün Azərbaycanın müstəqilliyi və bütövlüyü uğrunda canını fəda edən bütün vətən övladlarının, o cümlədən Xocalı şəhidlərinin ruhu şaddır. Artıq qisas alınıb, onların qanı yerdə qalmayıb.
Son illər Azərbaycan Xocalı soyqırımının tanıdılması üçün böyük işlər görüb, mühüm addımlar atıb və atılmaqdadır.
Bu gün həm də gördüyümüz kimi, bir qrup Azərbaycanın inkişafını görmək istəməyən qruplar bu qələbəni unutdurmağa çalışırlar. Bunun üçün bütün güclərini işə salıblar.
Ziddiyyətli məqam odur ki, bu gün müxtəlif ölkələrin liderləri Cənab Prezident haqqında yüksək fikir söylədikləri halda bu qruplar xalqımızın bütün dəyərlərini ayaq altına ataraq ölkəmizin uğurlarına kölgə salmağa çalışırlar. Onlar anlamalıdırlar ki, bu cəhdlər əbəsdir.
Biz Xocalını unutmuruq və unutdurmayacağıq!
Bu, təkcə bir tarix deyil, ədalət uğrunda milli mübarizəmizin simvoludur.
Xocalı şəhidlərinin əziz xatirəsi xalqımızın yaddaşında əbədi yaşayacaq, onların ruhu Azərbaycanın bu günkü gücündə, birliyində və azadlığında daim hiss olunacaq.
Allah bütün şəhidlərimizə rəhmət eləsin!
Milli Məclisin deputatı Ceyhun Məmmədov
Rəylər 2