Azərbaycan ilə Serbiya arasında 2013-cü ildə qurulan strateji tərəfdaşlıq əlaqələri ötən illər ərzində dost ölkələrimizin inkişafına və xalqlarımızın rifahının yaxşılaşmasına töhfə verib. Xalqlarının milli maraqlarına söykənən müstəqil siyasət yürüdən hər iki ölkə üçün beynəlxalq miqyasda böyük əhəmiyyət daşıyan bu əməkdaşlıq hazırda bütün istiqamətlərdə yüksələn xətlə inkişaf etdirilir.
Bu fikirləri AZƏRTAC-a açıqlamasında Milli Məclisin Gənclər və idman komitəsinin sədri Şahin İsmayılov deyib.
Azərbaycan-Serbiya əlaqələrinin çoxşaxəli tərəfdaşlığa əsaslandığını deyən komitə sədri bildirib ki, yüksəksəviyyəli qarşılıqlı səfərlər, fəal siyasi dialoq ikitərəfli münasibətlərin dinamik inkişafında müstəsna rola malikdir. Ümumilikdə ölkə rəhbərləri tərəfindən qəbul olunan qərarların uğurlu icrası nəticəsində ölkələrimiz arasında münasibətlər bu gün yeni inkişaf mərhələsinə qədəm qoyub. Bu baxımdan, Azərbaycan Prezidentinin Serbiyaya son səfəri iki ölkə arasında strateji tərəfdaşlığın daha da möhkəmlənməsinə mühüm töhfə verəcək.
“Dövlətimizin başçısının səfəri çərçivəsində keçirilən Azərbaycan və Serbiya arasında Strateji Tərəfdaşlıq Şurasının 1-ci iclasının da gündəliyi kifayət qədər geniş idi. İki ölkə arasında enerji sektorunda uğurlu əməkdaşlıq mövcuddur. Ötən illər ərzində Azərbaycan qazı digər Avropa ölkələri kimi Serbiyanın da enerji təhlükəsizliyində mühüm rol oynayır. Artıq ölkəmiz Serbiyada elektrik stansiyasının tikintisinə investisiya yatıracaq. Prezident İlham Əliyev qeyd etdi ki, bu, Azərbaycanın son illərdə Avropaya əsas investisiya qoyuluşlarından biri olacaq. Bu, həmçinin yüksəksəviyyəli qarşılıqlı etimadı nümayiş etdirir. Göründüyü kimi, ölkələrimiz artıq enerji sektorunda uzunmüddətli əməkdaşlığı şaxələndirirlər”, – deyə Şahin İsmayılov qeyd edib.
İki ölkə arasında iqtisadiyyatın ayrı-ayrı sahələri ilə yanaşı, mədəniyyət, media, idman və digər istiqamətlərdə uğurlu əməkdaşlıq perspektivlərindən bəhs edən Şahin İsmayılov bildirib ki, dövlətimizin başçısının səfəri çərçivəsində iki ölkə arasında imzalanan sənədlər Azərbaycan–Serbiya münasibətlərinin qarşılıqlı faydalı və uzunmüddətli əməkdaşlıq prinsipinə əsaslandığını nümayiş etdirir.
Ölkələrimizin parlamentləri arasında da səmərəli tərəfdaşlıq əlaqələri mövcud olduğunu deyən komitə sədri qeyd edib ki, istər ikitərəfli əsasda, istərsə də beynəlxalq təsisatlar çərçivəsində mövcud fəal təmaslar münasibətlərin davamlı və dinamik inkişafına təkan verir.
