Ulu Öndər Heydər Əliyevin böyük müdrikliklə müəyyənləşdirdiyi enerji strategiyasının uğurlu icrası nəticəsində Azərbaycanın neft və qaz sənayesində əldə olunan mühüm nailiyyətlər ölkəmizin hərtərəfli inkişafına böyük töhfə verir.
Bunu Modern.az-a açıqlamasında Milli Məclisin Gənclər və idman komitəsinin sədri Şahin İsmayılov bildirib.
Enerji sektorunun dinamik inkişafının ölkəmizin sosial-iqtisadi tərəqqisində önəmli rolundan bəhs edən Şahin İsmayılov deyib:
“Neft-qaz gəlirlərinin səmərəli şəkildə yönəldilməsi nəticəsində infrastrukturun yenilənməsi, sənayeləşmənin sürətlənməsi, sosial rifahın yüksəldilməsi təmin olunub”.
Komitə sədri bildirib ki, bu gün Azərbaycan Prezident İlham Əliyevin uzaqgörən və məqsədyönlü siyasəti nəticəsində enerji təhlükəsizliyini tam təmin etməklə yanaşı, şaxələndirilmiş ixrac-nəql yolları vasitəsilə regionun iqtisadi inkişafında və Avropanın enerji təhlükəsizliyində mühüm rol oynayır. Azərbaycan hazırda zəngin karbohidrogen ehtiyatları ilə yanaşı, həm də maddi-texniki bazası və yüksəkixtisaslı kadr potensialı ilə dünyada qabaqcıl enerji dövləti kimi tanınır.
Azərbaycanın təşəbbüsü və iştirakı ilə icra olunan enerji layihələrinin əhəmiyyətindən danışan Şahin İsmayılov qeyd edib ki, son onilliyin əsas meqalayihələrindən biri olan Cənub Qaz Dəhlizi beynəlxalq ictimaiyyətin diqqət mərkəzindədir. Bu baxımdan, Cənub Qaz Dəhlizi həm təchizat, həm də marşrut şaxələndirilməsini təmin etməklə Avropa İttifaqının enerji təhlükəsizliyinin təmin olunmasında mühüm rol oynayır. Bu gün Azərbaycan qazı 12 ölkəyə təchiz olunur. Son bir il ərzində Azərbaycandan qaz alan ölkələrin sayının 8-dən 12-yə yüksəlməsi uğurlu enerji siyasətimizin nəticəsidir.
Beynəlxalq tədbirlərin ölkəmizdə yüksək səviyyədə keçirildiyini qeyd edən komitə sədri “Bakı Enerji Həftəsi” çərçivəsində təşkil olunan tədbirlərin 30 ildir regionumuzda, onun hüdudlarından kənarda enerji təhlükəsizliyinə, bu sahədə əməkdaşlıqların formalaşmasına töhfə verdiyini bildirib. “Bu gün Azərbaycan qlobal çağırışlarda fəal iştirak edən ölkə kimi böyük nüfuza malikdir. “Bu xüsusda, dünyanın 200-ə yaxın ölkəsindən 76 mindən çox nümayəndənin, o cümlədən dövlət və hökumət başçılarının qatıldığı COP29 çərçivəsində qazanılan böyük nailiyyətləri qeyd etmək lazımdır. Dövlətimizin başçısının bildirdiyi kimi Azərbaycanın hədəfi ətraf mühiti ən çox çirkləndirən ölkələr, yəni inkişaf etmiş ölkələr ilə bundan əziyyət çəkən, yəni inkişafda olan ölkələr arasında etimadın artırılması idi. Ölkəmiz bu tarixi uğura nail oldu”, – deyə Şahin İsmayılov vurğulayıb.
