Bu gün səhər saatlarından başlayaraq Xocalı faciəsinin 32-ci ildönümü ilə əlaqədar insanlar “Ana harayı” abidəsini ziyarət edir.
News365.az da hadisə yerində olub, prosesləri izləyib. Eyni zamanda bəzi soydaşlarımızla həmsöhbət olub. Saytımızla fikirlərini bölüşən “Eyyubov MMC”-nin baş direktoru Mirqiyas Sarıyevlə müsahibəni təqdim edirik:
-Mirqiyas müəllim, hansı hisləri keçirirsiniz?
-Əlbbət də ki, çox həyəcanlıyam. Əsrin faciəsindən-Xocalı soyqırımından bizi 32 illik zaman fasiləsi ayırsa da biz hər gün o məşum və dəhşətli gecəni xatırlayırıq. Fevralın 25-dən 26-na keçən gecən Ermənistan yaraqlıları 366 mototatıcı alayın dəstəyi ilə Xocalı şəhərinə soxuldu. Bildiyimiz kimi müharibənin müəyyən qaydaları var. Hücum zamanı mülki vətəndaşlara “humanitar dəhliz” verilir. Amma ermənilər bütün qaydaları ən kobud şəkildə pozdu və şəhər sakinlərinin soyqırımını həyata keçirdi. Əslinə baxsan o zaman ermənilərin hədəfi də mülki əhali idi. Onlar qətliam törətməklə azərbaycanlıların gözünü qorxutmaq istəyirdi. Ona görə də mülki insanların günahsız yerə qətl edilməsi bizi hər zaman ağrıdır.
– Bəs, o zaman aparıcı dövlətlər niyə bu soyqırımına laqeyid qaldı?
– O zaman Azərbaycan yenicə müstəqillik qazanmışdı. Dünya ölkələrinin çoxu bizim heç müstəqilliyimizi tanımamışdı. Üstəlik, Azərbaycan informasiya blokadasına alınmışdı. Səsimiz necə deyərlər heç Biləcəridən o yana keçmirdi. Üstəlik, Ermənistan-Azərbaycan münaqişəsinin alovlanmasında maraqlı dövlətlər çox idi. Bir sözlə dünyanın Xocalı soyqırımına laqeyid qalmasının səbəbləri çox idi.
-Etiraf edək ki, Xocalı soyqırımını tanıtmaq üçün xeyli zaman lazım gəldi…
– Bəli, uzun müddət Azərbaycanın haqq səsi dünyada eşidilmədi. Yalnız bu əsrin əvvəllərində biz dünyaya sözün tam mənasında açıla bildik. Məsələn, 2008-ci ildə Heydər Əliyev Fondunun vitse-prezidenti Leyla Əliyevanın təşəbbüsü ilə “Xocalıya ədalət!” kampaniyası başladı. Etiraf edək ki, o vaxta qədər dünyanın Xocalı qətliamı barədə çox az məlumatı vardı. Dövlət və QHT-lərin birgə səyi sayəsində Xocalı soyqırımı barədə dünya ictimaiyyəti səhih məlumat əldə edə bildi. Məhz bundan sonra bir sıra ölkələrin parlamentləri və inzibati ərazi vahidləri Xocalıda baş verənləri soyqırımı kimi tanıdı. Hal-hazırda Xocalı soyqırımını dünyada 9 ölkə və ABŞ-nin 21 ştatı tam və ya parlament səviyyəsində qətliam kimi tanıyıb.
– Amma gec də olsa ədalət yerini tapdı. Xocalıda yenidən Azərbaycan bayrağı dalğalandı…
– Tamamilə doğru deyirsiniz. Xocalı cəlladları fiziki cəhətdən cəzalanmasa da şəhidlərimizin intiqamı alınıb. 15 oktyabr 2023-cü ildə Azərbaycan Prezidenti İlham Əliyev Xocalı şəhərində müqəddəs üçrəngli bayrağımızı qürurla dalğalandırdı. Məhz həmin gün təşnə olmuş yanğımızın üstünə soyuq su çiləndi. Məhz həmin gün şəhid xocalıların narahat ruhu dogma ocaqlara qayıtdı, rahatlıq tapdı. Məhz həmin gün şahid xocalılar ilk dəfə sevinc göz yaşlarına boğuldu.
Yəni bəşəriyyətin, konkret olaraq dünya ağalığı iddiasında olan Qərbin edə bilmədiyini Azərbaycan xalqı, Azərbaycan dövləti və onun Müzəffər Ali Baş Komandanı çox qısa zamanda etdi. Və dünyanın yadından çıxmış “ruhlar şəhəri” Xocalı yenidən dirçəlməyə başladı.
-Təsadüfü deyil ki, uzun fasilədən sonra bu il xocalılar soyqırımın ildönümü öz ocaqlarında qeyd edirlər…
– Çox şükürlər olsun ki, 32 ildən sonra xocalılar nəhayət ki, öz dogma ocaqlarına qayıtdı, nisgillərinə, həsrətlərinə bir son verdilər. Nə xoş haldır ki, Azərbaycan Respublikasının Prezidenti İlham Əliyev bu gün Xocalı rayonunda Xocalı soyqırımı memorialının təməlini qoydu, şəhər sakinləri ilə görüşdü. Bundan gözəl xəbər ola bilməz.
