2025-ci il Azərbaycan idmanı üçün mühüm uğurlarla yadda qaldı. Beynəlxalq yarışlarda qazanılan iki mindən çox medal, o cümlədən altı yüzdən çox qızıl medal Azərbaycanın idman ölkəsi kimi mövqeyini daha da möhkəmləndirib. Bu nəticələr həm idmançılarımızın peşəkarlığının göstəricisi, həm də ölkəmizdə dövlət səviyyəsində idmana göstərilən diqqətin parlaq nəticəsidir. Bu qazanılan uğurlar gələcək illərdə daha böyük hədəflərə yol açır.
Bu fikirləri AZƏRTAC-a açıqlamasında Milli Məclisin Gənclər və idman komitəsinin sədri Şahin İsmayılov səsləndirib.
Azərbaycanda idmanın inkişafının, əldə olunan nailiyyətlərin bu sahədə həyata keçirilən uğurlu dövlət siyasətinin nəticəsi olduğunu söyləyən komitə sədri deyib: “Azərbaycan Respublikasının Prezidenti, Milli Olimpiya Komitəsinin Prezidenti İlham Əliyevin müdrik rəhbərliyi ilə bütün istiqamətlərdə olduğu kimi idman sahəsində də davamlı işlər həyata keçirilib. Dövlətimizin başçısının 2025-ci ilin idman yekunlarına həsr olunan mərasimdəki çıxışında qeyd etdiyi kimi, düzgün aparılan siyasət idmanın inkişafını şərtləndirir və gəncləri idmanla məşğul olmağa daha da həvəsləndirir. Bu da çox önəmlidir. Çünki sağlam gənc nəsil yetişməsə, idman uğurlarını əldə etmək mümkün olmayacaq”.
Gənclərin sağlam ruhda, yüksək mənəvi dəyərlər əsasında tərbiyəsinin dövlətin idman siyasətinin ayrılmaz tərkib hissəsi olduğunu deyən Şahin İsmayılov bildirib ki, bu gün ölkənin bütün bölgələrini əhatə edən müasir idman infrastrukturu yaradılıb. Gənclərin idmana cəlb olunması, müasir idman obyektlərindən istifadənin genişləndirilməsi sağlam həyat tərzini təşviq edir və gələcək nəsillərin fiziki hazırlığının möhkəmlənməsinə şərait yaradır.
Komitə sədri qeyd edib ki, bölgələrimizdə də müasir idman infrastrukturunun yaradılması beynəlxalq idman tədbirlərinin ölkəmizin digər şəhər və rayonlarında keçirilməsinə imkan verir. Bu xüsusda, cari ildə III MDB Oyunlarının ölkəmizin yeddi müxtəlif şəhərində yüksək səviyyədə təşkil olunması infrastruktur potensialını nümayiş etdirdi. Eyni zamanda Bakıda ilk dəfə keçirilən UFC turniri, eləcə də Formula1 yarışlarının davamlı təşkili idman vasitəsilə ölkəmizin yüksək səviyyədə təqdimatına imkan yaradır. Bu tədbirlər təkcə idman uğuru deyil, eyni zamanda, ölkənin turizm və iqtisadi potensialının inkişafına töhfə verir.
Azərbaycanda qış idman növlərinin inkişafı üzrə də mühüm işlərin görüldüyünü qeyd edən Şahin İsmayılov deyib: “Dövlətimizin başçısının çıxışında qeyd etdiyi kimi, Şahdağ Turizm Xizək Mərkəzinin inkişafı hər il təmin edilir. Hər il biz yeni traslar, yeni xizək zolaqları istifadəyə veririk. Əminəm ki, yaxın 1-2 ilə trasların uzunluğu 50 kilometri ötəcək, təqribən 55 kilometr olacaq. Gələcəkdə yeni mərhələnin inkişafı ilə bağlı da məsələlərə baxılacaq. Beləliklə, infrastrukturun genişləndirilməsi, yeni xizək zolaqlarının istifadəyə verilməsi həm bölgədə iqtisadi inkişafı artırır, həm də Azərbaycan idmanında yeni bir səhifə açır”.
Şahin İsmayılov bildirib ki, ötən illərdə əldə olunan nailiyyətlərin məntiqi nəticəsi olaraq, Bakı şəhərinin “Dünyanın İdman Paytaxtı” seçilməsi Azərbaycan idmanına verilən yüksək beynəlxalq qiymətdir. Azərbaycanda qarşıdakı illərdə də idmanın davamlı inkişafı təmin ediləcək, ölkəmiz beynəlxalq idman ailəsində öz mövqeyini daha da möhkəmləndirəcək.
