Vətən müharibəsinin ilk günlərindən etibarən rəşadətli Azərbaycan Ordusu Ermənistanın uzun illər ərzində qurduğu müdafiə xətlərini və möhkəmləndirilmiş istehkamlarını yararaq işğal altındakı torpaqlarımızı azad etməyə başladı. Oktyabrın 4-də Cəbrayıl şəhərinin azad olunması Vətən müharibəsinin gedişində mühüm hərbi və strateji uğur olmaqla yanaşı, xalqımızın böyük Zəfərinin ilk müjdələrindən biri oldu.
Bunu Modern.az-a açıqlamasında Milli Məclisin Gənclər və idman komitəsinin sədri Şahin İsmayılov söyləyib.
Onun sözlərinə görə, iyirmi yeddi il işğal altında qalan Cəbrayıl erməni vandalizminin ağır nəticələrinə məruz qalmışdı. Şəhər və kəndlər, yaşayış evləri, təhsil və səhiyyə müəssisələri, tarixi-mədəni abidələr dağıdılmış, təbii sərvətlər talan edilmişdi.
“Ağacların kəsilməsi, yaşıllıqların məhv edilməsi, məscid və digər ibadət yerlərinin təhqir olunması işğalın yalnız maddi deyil, həm də mənəvi və ekoloji fəsadlarını nümayiş etdirirdi. Bu dağıntılar Azərbaycan xalqının tarixi və mədəni irsinə vurulmuş ağır zərərin miqyasını göstərir. Müzəffər Ali Baş Komandan İlham Əliyevin rəhbərliyi ilə qəhrəman əsgər və zabitlərimizin həyata keçirdikləri Cəbrayıl əməliyyatı Vətən müharibəsinin gedişində mühüm dönüş nöqtələrindən biri oldu. Şəhərin azad edilməsi Azərbaycan Ordusunun döyüş təşəbbüsünü daha da gücləndirdi, sonrakı hərbi əməliyyatlar üçün əlverişli şərait yaratdı. Xüsusilə Xocavənd rayonunun cənubundakı yaşayış məntəqələri və strateji əhəmiyyətə malik Hadrut qəsəbəsi istiqamətində irəliləyiş üçün yeni imkanlar açıldı. Beləliklə, Cəbrayılın azad olunması həm hərbi-strateji əhəmiyyətinə, həm də xalqımızın qələbəyə inamını daha da möhkəmləndirməsinə görə Vətən müharibəsinin tarixində xüsusi yer tutur”.
Şahin İsmayılov bildirib ki, Vətən müharibəsində qazanılan Qələbədən sonra Prezident İlham Əliyevin Cəbrayıla səfəri, şəhərdə və tarixi Xudafərin körpüsündə üçrəngli Dövlət Bayrağımızı ucaltması xalqımızın yaddaşına həkk olunan tarixi hadisələrdəndir:
“Bu anlar Azərbaycanın öz torpaqları üzərində suveren hüquqlarını bərpa etməsinin, uzun illər davam edən işğala son qoyulmasının və məcburi köçkünlərin doğma yurdlarına qayıdış ümidlərinin gerçəkləşməsinin rəmzinə çevrildi. Bu gün Cəbrayıl öz tarixinin yeni mərhələsini yaşayır. İşğaldan azad edilməsindən ötən altı il ərzində şəhərdə genişmiqyaslı bərpa və quruculuq işləri həyata keçirilib, müasir yaşayış və sosial infrastrukturun yaradılması istiqamətində mühüm addımlar atılıb. Prezident İlham Əliyevin rəhbərliyi ilə həyata keçirilən Böyük Qayıdış siyasəti çərçivəsində Cəbrayılın yenidən qurulması yalnız dağıdılmış infrastrukturun bərpasını deyil, müasir şəhərsalma prinsiplərinə əsaslanan, dayanıqlı və əlverişli yaşayış mühitinin yaradılmasını nəzərdə tutur. “Azərbaycan Respublikasının işğaldan azad edilmiş ərazilərinə Böyük Qayıdışa dair I Dövlət Proqramı” çərçivəsində Cəbrayılda yaşayış kompleksləri inşa olunur, yol-nəqliyyat, kommunal və sosial infrastruktur yaradılır, iqtisadi fəaliyyətin genişləndirilməsi və yeni iş yerlərinin açılması istiqamətində tədbirlər həyata keçirilir. Bu işlər şəhərin uzunmüddətli inkişafının təmin olunması, əhalinin məşğulluq imkanlarının artırılması və keçmiş məcburi köçkünlərin dayanıqlı məskunlaşması baxımından mühüm əhəmiyyət daşıyır”.
O, vurğulayıb ki, artıq Cəbrayıla həyat qayıdır. 2024-cü il oktyabrın 4-də Prezident İlham Əliyevin və birinci xanım Mehriban Əliyevanın iştirakı ilə Cəbrayıl şəhərində inşa olunan yaşayış kompleksinin açılışı olub:
“Şəhərdə yaradılan müasir yaşayış şəraiti, sosial infrastruktur və iqtisadi imkanlar əhalinin təhlükəsiz və firavan həyatının təmin olunmasına xidmət edir. Bu prosesin əhəmiyyəti yalnız insanların öz doğma torpaqlarına qayıtması ilə məhdudlaşmır. Böyük Qayıdış eyni zamanda işğaldan azad edilmiş ərazilərin ölkənin vahid iqtisadi və sosial məkanına reinteqrasiyasını, regionun mövcud potensialından səmərəli istifadəni və uzunmüddətli inkişafını təmin edən strateji dövlət siyasətidir. Bu gün cəbrayıllılar şəhər gününü xüsusi qürur və iftixar hissi ilə qeyd edirlər. Altı il əvvəl hərbi Qələbənin mühüm mərhələlərindən birinə çevrilən Cəbrayıl indi genişmiqyaslı quruculuğun və Böyük Qayıdışın ünvanlarından biridir”.
