Azərbaycan Respublikası Gənclər Fondunun maliyyə dəstəyi, “EcoHub” Ekoloji Təşəbbüslərə Dəstək İctimai Birliyinin təşkilatçılığı və “INNOLAND” İnkubasiya və Akselerasiya Mərkəzinin tərəfdaşlığı ilə “Yaşıl Gələcək Üçün” layihəsi həyata keçirilib.
Layihənin əsas məqsədi gənclərin ekoloji maarifləndirmə ilə bağlı bilik və məlumatlılığını artırmaq, onların milli sərvətlərin qorunmasında fəal iştirakını təmin etmək və onlarda ətraf mühitə həssas münasibət formalaşdırmağa təşviq etmək, həmçinin ətraf mühitin mühafizəsini dərk edən, məsuliyyətli, gələcəkdə ekoloji tarazlığa riayət edən nəslin yetişdirilməsinə töhfə verməkdir.
Layihə çərçivəsində gənclər üçün ekoloji maarifləndirmə ilə bağlı təlim proqramları təşkil edilib. Təlim iştirakçıları mövcud ekoloji problemlər, ətraf mühitə insanın təsiri, iqlim dəyişmələri və karbon emmisiyası, həmçinin bu il ölkəmizdə keçiriləcək COP29 haqqında və digər bu kimi mühim ekoloji məsələlər üzrə ekspert tərəfindən məlumatlandırılıb.
Qeyd edək ki, layihədə ümumilikdə 100 gənc iştirak edib və təlimi uğurla başa vurmuş gənclər sertifikatla təltif edilib.
Məlumat üçün bildirək ki, layihə Azərbaycan Respublikası Gənclər Fondunun “İdeyanı reallaşdır 2023” Gənclərin Fərdi Layihələri üzrə Qrant Müsabiqəsinin qaliblərindəndir.
