2024-cü il sentyabrın 1-də Azərbaycan Respublikası Milli Məclisinə keçiriləcək növbədənkənar seçkilərin təşviqat mərhələsi çərçivəsində Yeni Azərbaycan Partiyası (YAP) tərəfindən 83 saylı Beyləqan seçki dairəsindən deputatlığa namizədliyi irəli sürülmüş Şahin İsmayılovun Beyləqan rayonunun Aşıqalılar kəndinin seçiciləri ilə görüşü keçirilib.
Tədbiri giriş sözü ilə YAP Beyləqan rayon təşkilatının sədri Müşfiq Səfərov vətəndaşların Prezident, Yeni Azərbaycan Partiyasının Sədri İlham Əliyevin rəhbərliyi ilə həyata keçirilən uğurlu siyasətə olan inamından danışaraq xalq-iqtidar birliyindən, bu sarsılmaz birliyin nəticəsində əldə olunan uğurların davamlılığından bəhs edib.
Deputatlığa namizəd Şahin İsmayılov əvvəlcə YAP-ın seçki platforması haqqında ətraflı məlumat verib. Bildirib ki, Prezident İlham Əliyevin ölkəmizə rəhbərlik etdiyi dövrdə ölkədə gedən dinamik inkişaf, neft kapitalının insan kapitalına çevirilməsi, vətəndaşların rifah halının yaxşılaşdırılması və peşəkar ordu quruculuğu böyük nailiyyətlərdir. Vurğulayıb ki, bu amillər YAP-ın seçkilərdə uğur qazanmasını şərtləndirir.
Tədbirdə seçki qərargahının üzvləri Nizami Bayramov və Tahir Abdullayev, görüş iştirakçılarından Vilayət Əsgərov, Yunus Məmmədov, şəhid atası Ələm Qafarov və başqaları çıxış edərək seçiciləri partiyanın namizədini dəstəkləməyə çağırıblar.
