Brüsselin BOZAR İncəsənət Sarayında ölkəmizin Belçikadakı səfirliyi tərəfindən Ümummilli Lider Heydər Əliyevin anadan olmasının 100 illik yubileyinə həsr olunmuş “Odlar Yurdundan bahar əhvali-ruhiyyəsi” adlı anım konserti təşkil edilib.
AZƏRTAC xəbər verir ki, Azərbaycanın Belçikadakı səfiri Vaqif Sadıqov çıxış edərək Heydər Əliyevin tarixi lider rolunu uğurla yerinə yetirməsindən danışıb, XX əsrin sonlarında geosiyasi çağırışların, iqtisadi transformasiya və ölkəmizə qarşı başlanmış işğalçılıq müharibəsinin faciəli nəticələri ilə dolu fırtınalı dünyada Azərbaycanın irəliyə aparılmasına rəhbərlik etdiyini bildirib.
Konsertdə Azərbaycanın Xalq artisti Yeganə Axundovanın iştirakı və Beynəlxalq müsabiqələr laureatı, dirijor Fərhad Qarayusiflinin rəhbərliyi ilə Bakı Kamera Orkestri tərəfindən Azərbaycan və Avropa bəstəkarlarının əsərləri və Azərbaycan xalq mahnıları təqdim olunub.
Tamaşaçıların böyük marağına səbəb olmuş konsertdə Belçika və Lüksemburq rəsmiləri, Avropa İttifaqı qurumlarının, Brüsseldəki diplomatik korpusun, elm və mədəniyyət dairələrinin, yerli kütləvi informasiya vasitələrinin nümayəndələri və burada yaşayan soydaşlarımız iştirak ediblər.
