“Təhsildə İnkişaf və İnnovasiyalar üzrə IX Qrant Müsabiqəsi” çərçivəsində həyata keçirilən “TESOL ilə Peşəkar İnkişafa Dəstək” – Xarici dil müəllimləri üçün onlayn ixtisasartırma və mentorluq proqramı qrant layihəsi uğurla başa çatıb. Layihə İsmayıllı rayonu Qurbanəfəndi kənd tam orta ümumtəhsil məktəbinin ingilis dili müəllimi Fatma Talıblı tərəfindən icra olunub.
Layihənin əsas məqsədi müxtəlif regionlardan olan xarici dil müəllimlərinin peşəkar inkişafını dəstəkləmək, onların beynəlxalq standartlara uyğun tədris bacarıqlarını gücləndirmək və müasir yanaşmalar əsasında tədris keyfiyyətinin artırılmasına töhfə vermək olub.
Layihə çərçivəsində 20 xarici dil müəllimi üçün onlayn TESOL hazırlıq və mentorluq proqramı təşkil edilib. İştirakçılar proqram müddətində beynəlxalq standartlara uyğun tədris metodikaları, dərsin planlaşdırılması, effektiv ünsiyyət və şagirdyönümlü yanaşmalar üzrə bilik və bacarıqlarını inkişaf etdiriblər. Müəllimlərin öyrənmə prosesinə dəstək məqsədilə mentor Fəridə Ağayevanın iştirakı ilə onlayn görüşlər təşkil olunub. Görüşlər zamanı kursun məzmunu, tədris prosesində tətbiq olunan müasir metodlar və peşəkar inkişaf imkanları barədə məlumat verilib, müəllimlərin sualları cavablandırılıb və onlara metodiki tövsiyələr təqdim olunub.
Layihənin sonunda həm onlayn, həm də əyani formatda bağlanış mərasimləri keçirilib. Tədbirlər zamanı layihə müddətində əldə olunan nəticələr təqdim edilib, iştirakçıların davamlılıq layihələri haqqında məlumat verilib və proqramın müəllimlərin peşəkar inkişafına verdiyi töhfələr müzakirə olunub. Onlayn bağlanış tədbirində müəllimlər layihə ilə bağlı fikir və rəylərini bölüşərək qazandıqları təcrübələri digər iştirakçılarla paylaşıblar.
Layihənin nəticəsi olaraq iştirakçı müəllimlərin beynəlxalq standartlara uyğun tədris bacarıqlarının inkişaf etdirilməsinə, onların peşəkar şəbəkələşməsinə və təcrübə mübadiləsinin gücləndirilməsinə mühüm töhfə verilib.
