Azərbaycan Respublikasının Elm və Təhsil Nazirliyi tərəfindən elan edilmiş Təhsildə inkişaf və innovasiyalar üzrə 9-cu qrant müsabiqəsinin qalibi olan “Simulyasiya ilə Riyaziyyat səfəri” layihəsi uğurla yekunlaşıb. Layihənin əsas məqsədi 7–9-cu sinif şagirdlərinin riyaziyyat fənninə marağını artırmaq, onların analitik düşünmə və problem həll etmə bacarıqlarının inkişafına töhfə vermək olub.
Layihə çərçivəsində 30 şagirdin iştirakı ilə təşkil olunan riyaziyyat təlimləri müddətində iştirakçılara interaktiv və innovativ yanaşmalar əsasında dərslər təqdim edilib. Təlimlər zamanı müxtəlif riyazi mövzular PhET Interactive Simulations platformasının simulyasiyaları vasitəsilə vizual və praktik şəkildə izah olunub. Bu metod şagirdlərin mövzuları daha dərindən mənimsəməsinə və öyrənmə prosesində aktiv iştirakına şərait yaradıb.
Təlimlər müddətində iştirakçılara həm fərdi, həm də qrup tapşırıqları təqdim olunub, proses mütəxəssis dəstəyi ilə müşayiət edilib. Bu yanaşma şagirdlərin məntiqi düşünmə, analiz etmə və problem həll etmə bacarıqlarının inkişafına müsbət təsir göstərib.
Layihənin bağlanış mərhələsində iştirakçıların əldə etdikləri bilik və bacarıqları əks etdirən təqdimat və videoçarx nümayiş olunub. Şagirdlərin nailiyyətləri iştirakçılar və qonaqlar tərəfindən maraqla qarşılanıb.
Qeyd edək ki, “Simulyasiya ilə Riyaziyyat səfəri” qrant layihəsi Gülnar Hüseynova tərəfindən Gəncə şəhəri Şah İsmayıl Xətai adına 13 nömrəli tam orta məktəbdə həyata keçirilib. Layihə çərçivəsində tətbiq olunan interaktiv metodlar şagirdlərin riyaziyyata marağının artmasına və onların ümumi inkişafına mühüm töhfə verib.
