Bilmirəm, diqqət etmisiniz, ya yox, amma Azərbaycan dövlətinin, hakimiyyətinin hər uğurundan, hər yüksəlişindən sonra hansısa (ixtiyari) qüvvələr sanki planlı, məqsədli şəkildə meydana, dövriyyəyə buraxılırlar: Gah Şvabenin “dili açılır”, gah səfirliyimiz qarşısında təxribat törədilir, gah “söyüş müxalifəti” aktivləşdirilir, gah AXCP-nin həbsdə olan sədri barədə Britaniya mediasından silsilə yazılar boylanır, gah da Ermənistandakı revanşistlər Siranuş Saakyan kimi hərdəmxəyalların, saxta hüquq müdafiəçilərinin vasitəsi, vəsiləsilə ictimai-siyasi kuluarlarda, mətbuat konfranslarında qəfildən zühur etməyə başlayır…
Bu gün mən sonuncu barədə bir-iki kəlmə danışacağam.
Demək, haqqında bəhs etdiyim Siranuş ətrafındakılara “şirinquş” kimi görünmək üçün ağlına gələni danışıb və buyurub ki, Bakıda həbsdə olan erməni əsilli cinayətkarlar guya dini mənsubiyyətlərinə görə ittiham olunublar.
Eyvah! “Qırmızılığın”, həyasızlığın da bu qədəri…
Təbii, öz aləm(lər)ində yeni variantlar axtarıb tapmaq, məsələni əsas kontekstdən, radiusdan çıxarmaq belə nanəciblərin hər zaman həyat və fəaliyyət missiyası olub. Amma necə deyərlər: “Ta bu cür şitini, şorunu, yağını çıxararaq yox da…”
Adamlar (təbii, əgər onlara adam demək mümkünsə!) öz ifadələrində dil-dil ötüblər, törətdikləri cinayətləri etiraf ediblər, əksər epizodlarla bağlı vandal əməllərini boyunlarına alıblar. Və indi sən ortalığa düşmüsən ki, elə deyil, belədir?!
Ermənistan hakimiyyəti, hökuməti və xalqı bir dəfə də olsun bu residivistlərin müdafiəsinə qalxmayıb, onların ekstradisiyasını tələb etməyib. İndi sən hamıdan ağıllı çıxmısan?!
Vardanyanın, Harutyunyanın, digərlərinin heç doğmaca ailə üzvləri həmin iddiada bulunmayıb ki, mövzu din mövzusudur. İndi sən Papadan daha artıq katolik olmağa, görünməyə çalışırsan?!
Nə isə…
2 gündür Saakyanın axtarışında, sorğusundayam ki, görüm bu kimdir, nə işlə məşğuldur, hara bağlıdır, hansı məzhəbə, mənsəbə, mərama qulluq edir…
Bir də baxam, nə?
Bu “həşəmətli” hüquq müdafiəçisi demə həm də Leyla Yunusun lap yaxın rəfiqəsi və ailə dostu imiş. Bəli, bəli, düz eşitdiniz, Leyla Yunusun!
Siranuşla eyni qandan olan Leyla Yunusun! Bakıda həbs edilməmişdən öncə Fransa səfirliyindən 3 saata viza alan, “ölürəm-ölürəm, uzağı 15 günlük ömrüm qalıb” deyə-deyə 20 ildir yaşayan Leyla Yunusun! Arif Yunusun “əri” Leyla Yunusun! Erməni revanşistlərin başqa bir tayı Leyla Yunusun! Yaramaz, nankor, nadan, təxribatçı Leyla Yunusun!
Vəssalam da…
Belə mənbədən qidalanan, belə ləyaqətsizdən informasiya alan “podruqa” başqa nə deməli idi ki?!
Elşən Musayev, Milli Məclisin deputatı, Demokratik Maarifçilik Partiyasının sədri
