Azərbaycan Prezidenti İlham Əliyev növbəti dəfə “3+3” platformasının əhəmiyyətindən danışıb.
Dövlət başçısı bu məsələyə Rusiyanın Təhlükəsizlik Şurasının katibini qəbul edərkən toxunub.
“Regional məsələlərin “3+3” formatında həll edilməsi vacibdir”.
Prezident vurğulayıb ki, “3+3” formatında region ölkələrinin iştirakı ilə həll edilməsi vacibdir və bu formatda müvafiq səviyyələrdə görüşlər keçirilməlidir.
Qeyd edək ki, bütün region ölkələri üçün olduqca əhəmiyyətli olacağı gözlənilən “3+3” plaftorması ideyası da məhz Azərbaycan Prezidenti İlham Əliyevə məxsusdur. Dövlətimizin başçısı Cənubi Qafqazda və bütövlükdə regionda sülhün, sabitliyin və əmin-amanlığın olması üçün bu formatın yaranmasını təklif verib. Heç şübhəsiz ki, bu altılıq formatı ilə regional əlaqələr və əməkdaşlıq bütün tərəflər üçün olduqca mühüm töhfələr verəcək.
Milli Cəbhə Partiyasının (MCP) sədr müavini Ehtiram Mehdiyev Cebhe.info-ya açıqlamasında bildirib ki, 44 günlük Vətən müharibəsindən sonra regionda yeni bir siyasi nizam yarandı:
“Azərbaycan və Türkiyə prezidentləri tərəfindən “3+3” platforması planının irəli sürüldüyünü xüsusi vurğulamaq lazımdır. Bu, region ölkələrinin birgə siyasi-iqtisadi əməkdaşlığını özündə ehtiva edir. Azərbaycan, Türkiyə, Rusiya, Gürcüstan, Ermənistan və İranın daxil olacağı platforma kənar güclərin regionda fəaliyyətinin qarşısını alacaq. Ona görə də Rusiya bu platformada maraqlıdır. Prezident İlham Əliyevin bu məsələni məhz Rusiya rəsmisi ilə müzakirə etməsi də xüsusi əhəmiyyət kəsb edir. Dövlət başçısı Azərbaycanın bu barədə mövqeyində dəyişiklik olmadığını vurğuladı”.
Həmsöhbətimiz əlavə edib ki, “3+3” platforması çərçivəsində regionda sülh və stabillik ola bilər:
“Bununla da regionda nəqliyyat və kommunikasiya əlaqələri qurular və inkişaf edər. Amma hazırda Ermənistan və Gürcüstan bu platformada maraqlı deyil. İranın da mövqeyi tam aydınlaşmayıb. Azərbaycan isə belə bir platformanın qurulmasında maraqlıdır. Buna baxmayaraq, “3+3” platforması öz aktuallığını qoruyur”.
