Prezident İlham Əliyevin Şuşa, Xocalı və Xankəndiyə son səfəri Qarabağda bərpa və yenidənqurma prosesinin uğurla davam etdiyini nümayiş etdirdi. Dövlət başçısının səfəri çərçivəsində əsas diqqət keçmiş məcburi köçkünlərin doğma yurdlarına qayıdışı, infrastruktur layihələrinin icrası və sosial həyatın bərpasına yönəldi. Cənab Prezident sakinlərlə görüşündə onların sosial rifahı, məşğulluğu və gündəlik həyat şəraiti ilə maraqlandı. Dövlət başçısı vurğuladı ki, dövlət bütün imkanlarını səfərbər edərək azad edilmiş torpaqlarda həyatın tam bərpasını təmin edəcək. Şuşada Qaladərəsi kəndində fərdi evlərin və infrastrukturun bərpası istiqamətində həyata keçirilən layihələr çərçivəsində artıq ilk ailələr doğma yurdlarına qayıdıblar. Burada mövcud olan 50 evdən bir hissəsi tam bərpa edilib, növbəti mərhələdə isə daha çox ailənin köçürülməsi nəzərdə tutulur.
Ümumiyyətlə, son illərdə Şuşada həyata keçirilən layihələr şəhərin tarixi simasının qorunması ilə yanaşı, onun müasir infrastruktura malik yaşayış və turizm mərkəzinə çevrilməsini hədəfləyir.
Prezident İlham Əliyevin səfərinin əsas istiqamətlərindən biri də Xocalı oldu. Uzun illər erməni işğalı nəticəsində dağıdılmış və xarabalığa çevrilmiş Xocalıda bu gün genişmiqyaslı tikinti işləri aparılır. Yeni yaşayış məhəllələri salınır, məktəblər, uşaq bağçaları və sosial obyektlər tikilir.
Dövlət başçısı burada aparılan işlərlə tanış olaraq aidiyyəti qurumlara tapşırıqlar verdi. Cənab Prezident bəyan etdi ki, Xocalının bərpası Azərbaycan dövləti üçün yalnız iqtisadi deyil, həm də tarixi və mənəvi məsələdir. Çünki Xocalı xalqımızın yaddaşında dərin iz buraxmış faciənin simvoludur.
Səfər zamanı Prezident sakinlərlə söhbətində vurğuladı ki, artıq Qarabağda həyat yenidən canlanır: “Biz bu torpaqlara həyatı qaytarırıq. İnsanlar öz doğma yurdlarında təhlükəsiz və rahat yaşayacaqlar.”
Hazırda Xocalıda elektrik, qaz, içməli su və internet infrastrukturu sürətlə yenilənir. Kənd təsərrüfatının inkişafı üçün də yeni layihələrin icrası nəzərdə tutulur. Bölgədə məşğulluğun artırılması məqsədilə müxtəlif istehsal və xidmət müəssisələrinin yaradılması planlaşdırılır.
Prezident İlham Əliyev səfər çərçivəsində Xankəndidə də bir sıra obyektlərin fəaliyyəti ilə tanış oldu. Burada yeni qurulan müəssisələr, sosial obyektlər şəhərin yeni inkişaf mərhələsinə qədəm qoyduğunu göstərir.
Dövlət başçısı Xankəndidə çıxışı zamanı bildirdi ki, Qarabağ və Şərqi Zəngəzur Azərbaycanın ən inkişaf etmiş bölgələrindən birinə çevriləcək. Dövlət tərəfindən bölgəyə milyardlarla manat investisiya yatırılır və bütün layihələr planlı şəkildə həyata keçirilir.
Əsas məqsəd insanların təhlükəsiz, firavan və rahat həyatını təmin etməkdir. Son illərdə Xankəndidə yolların yenilənməsi, enerji təminatının gücləndirilməsi, müasir yaşayış komplekslərinin tikilməsi bu məqsədə xidmət edir.
İşğaldan azad edilmiş ərazilərdə aparılan genişmiqyaslı quruculuq işləri çərçivəsində Xocalı və Xankəndidə yeni müəssisələrin istifadəyə verilməsi Qarabağın sosial-iqtisadi inkişafına töhfədir. Bu müəssisələr bölgədə sosial həyatın canlanmasına mühüm təsir göstərir.
Prezident İlham Əliyevin Şuşa, Xocalı və Xankəndiyə səfəri bir daha göstərdi ki, Qarabağda həyata keçirilən siyasətin əsas istiqaməti Böyük Qayıdış proqramıdır. Burada yeni bir inkişaf modeli qurulur. Bu modelin mərkəzində isə insan amili, doğma yurda qayıdış və milli həmrəylik dayanır.
Milli Məclisin deputatı Könül Nurullayeva
