Prezident İlham Əliyevin müdrik, uzaqgörən siyasəti nəticəsində bu gün Qarabağ və Şərqi Zəngəzur bölgələrində genişmiqyaslı bərpa-quruculuq işləri planlı şəkildə və yüksək templə icra olunur. Dövlət başçısının şəxsi nəzarəti ilə həyata keçirilən layihələr çərçivəsində infrastrukturun yenidən qurulması, yaşayış məntəqələrinin müasir standartlara uyğun salınması və mühəndis-kommunikasiya sistemlərinin yaradılması sürətlə təmin edilir. Keçmiş məcburi köçkünlərin doğma yurdlarına təhlükəsiz, mərhələli və ləyaqətli şəkildə qayıdışı üçün hərtərəfli şərait yaradılır.
Milli Məclisin Gənclər və idman komitəsinin sədri Şahin İsmayılov qəzetimizə açıqlamasında bildirib ki, həyata keçirilən tədbirlər yalnız yolların, yaşayış məntəqələrinin inşası və kommunal şəbəkələrin bərpası ilə məhdudlaşmır. Bölgənin hərtərəfli inkişafı üçün kompleks yanaşma tətbiq olunur. Təhsil və səhiyyə müəssisələrinin inşası, sosial xidmətlərin təşkili, məşğulluq imkanlarının yaradılması və iqtisadi fəallığın stimullaşdırılması Qarabağ və Şərqi Zəngəzurun uzunmüddətli, dayanıqlı inkişafı üçün geniş imkanlar açır. “Bu günlərdə möhtərəm Prezidentin Ağdərəyə səfəri bu yanaşmanın əyanı təzahürüdür. Vətən müharibəsi və 2023-cü ildə həyata keçirilən antiterror tədbirləri nəticəsində azad olunmuş digər ərazilərimiz kimi, Ağdərə də artıq inkişaf dövrünə qədəm qoyub. Burada həyata keçirilən quruculuq işləri zamanı bölgənin inkişaf perspektivləri nəzərə alınır, bütün proses sistemli şəkildə icra olunur. Əhalinin artımı, iqtisadi fəaliyyətin genişləndirilməsi və sosial ehtiyaclar öncədən planlaşdırılır. Dövlətin məqsədi bütün bölgələrdə olduğu kimi, işğaldan azad olunan torpaqlarımızda da müasir, rahat və funksional yaşayış mühitinin formalaşdırılmasıdır”, – deyə o deyib.
Komitə sədri qeyd edib ki, bu gün Ağdərədə də kəndlərarası əlaqələr, mühəndis-kommunikasiya xətlərinin çəkilişi əsas prioritetlər sırasındadır. Yol infrastrukturunun yenilənməsi kəndlərin bir-biri ilə və regional mərkəzlərlə əlaqəsini təmin edir. Su, qaz, elektrik və rabitə şəbəkələri müasir standartlar əsasında qurulur. Eləcə də rəqəmsal idarəetmə, enerji səmərəliliyi, ekoloji yanaşmalar və sosial məkanların optimallaşdırılması müasir tələblərə uyğun formada həyata keçirilir.
Ş.İsmayılov dövlət başçısının Ağdərəyə səfəri çərçivəsində 14,7 meqavat gücündə olan “Qozlukörpü” Su-Elektrik Stansiyasının istifadəyə verildiyini xatırladaraq deyib ki, bu, “yaşıl enerji zonası”na çevrilən regionun enerji təhlükəsizliyinə, ekoloji cəhətdən təmiz enerji istehsalına mühüm töhfə verir: “Azad olunmuş ərazilərdə sənaye müəssisələrinin yaradılması istiqamətində də çoxşaxəli işlər həyata keçirilir. Bu xüsusda Ağdərə rayonunda “Dəmirli” Filiz Emalı Kompleksinin fəaliyyətə başlamasını xüsusi qeyd etmək istərdim. İşğaldan azad edilmiş ərazilərdə dağ-mədən sənayesi üzrə fəaliyyət göstərən ilk müəssisədə təxminən min nəfər daimi işlə təmin olunub. Bu cür layihələr həmçinin bölgədə yeni iqtisadi mərkəzlərin formalaşmasına, məşğulluğun artmasına yol açır”.
Komitə sədri qeyd edib ki, bütün genişmiqyaslı və ardıcıl tədbirlərin nəticəsi olaraq bu gün işğaldan azad edilmiş torpaqlarda həyat tədricən bərpa olunur, sosial və iqtisadi fəallıq yüksəlir. Dövlətin yaratdığı təhlükəsiz və müasir yaşayış mühiti insanların doğma yurdlarına qayıdışını sürətləndirir, bölgədə dayanıqlı məskunlaşma təmin olunur. Görülən işlərin nəticəsidir ki, hazırda 73 min insan azad edilmiş torpaqlarda yaşayır, çalışır və təhsil alır ki, bu da həyata keçirilən siyasətin real nəticələr verdiyini aydın şəkildə nümayiş etdirir.
Əsmər QARDAŞXANOVA,
“Azərbaycan”
