Prezident İlham Əliyev: “44 günlük Vətən müharibəsi bizim şanlı tariximizdir, parlaq Qələbəmizdir”.
Azərbaycanda Vətən müharibəsində şəhidlərin xatirəsini əbədiləşdirən abidələrin ucaldılmasının çox mühüm tarixi və mənəvi əhəmiyyəti var. Bunlar Azərbaycanın 2020-ci ilin 44 günlük Vətən Müharibəsində canlarını qurban verən qəhrəmanların xatirəsini yaşatmaq və onların xidmətlərini xalqın yaddaşında əbədi saxlamaq məqsədini güdür. Bu abidələr, həm şəhidlərin şücaətini qeyd etmək, həm də gələcək nəsillərə onların qəhrəmanlığını anlatmaq baxımından mühüm əhəmiyyət daşıyır. Bu il Bakıda noyabrın 8-də açılışı olan Zəfər Parkı da Azərbaycan xalqının 2020-ci ilin 44 günlük Vətən Müharibəsindəki qələbəsini simvolizə edən bir layihədir. 2020-ci ilin 8 noyabrı, həm də Şuşanın azad edilməsi ilə bağlı tarixi bir gündür və bu səbəbdən Zəfər Parkının açılışı bu tarixə təsadüf edib. Prezident İlham Əliyev, birinci xanım Mehriban Əliyeva və oğulları Heydər Əliyev Zəfər parkının açılışında iştirak ediblər. Dövlətimizin başçısı burada Azərbaycanın üçrəngli Dövlət Bayrağını ucaldıb. Cənab Prezident Zəfər parkından birbaşa xalqa müraciət edib: “Bu gün Azərbaycan Zəfər bayramını qeyd edir. Bu münasibətlə bütün Azərbaycan xalqını ürəkdən təbrik edirəm, Azərbaycan Silahlı Qüvvələrini təbrik edirəm.
Hər birimiz üçün əziz bir gündə Vətən uğrunda öz canlarından keçmiş qəhrəman şəhidlərimizə Allahdan rəhmət diləyirəm. Allah bütün şəhidlərimizə rəhmət eləsin!
Biz şəhidlərimizin qisasını, qanını döyüş meydanında aldıq. 44 günlük Vətən müharibəsi bizim şanlı tariximizdir, parlaq Qələbəmizdir. Biz həm Birinci Qarabağ müharibəsinin, həm İkinci Qarabağ müharibəsinin, eləcə də antiterror əməliyyatının şəhidlərinin qanını döyüş meydanında aldıq, öz ərazi bütövlüyümüzü, suverenliyimizi bərpa etdik”. Prezident çıxışında, 2020-ci ilin 44 günlük Vətən Müharibəsinin Azərbaycan xalqı üçün tarixi bir zəfər olduğunu qeyd etdi. O, müharibənin yalnız ərazi bütövlüyünü bərpa etməklə yekunlaşmadığını, həm də Azərbaycanın qüdrətini və gücünü, müstəqil dövlət kimi möhkəm iradəsini dünyaya göstərdiyini vurğuladı. Azərbaycan xalqı, Prezidentin dediyi kimi, tarix boyu bu mübarizənin və zəfərin layiqincə sahibi oldu.
Qeyd edək ki, Prezident İlham Əliyevin 2020-ci il dekabrın 3-də imzaladığı Sərəncamda Azərbaycan xalqının Vətən müharibəsində göstərdiyi misilsiz qəhrəmanlığın və qazandığı möhtəşəm tarixi Zəfərin yaddaşlarda yaşadılması və ictimaiyyətə nümayiş etdirilməsi, şəhidlərimizin əziz xatirəsinin əbədiləşdirilməsi məqsədilə Bakıda Vətən Müharibəsi Memorial Kompleksinin və Zəfər muzeyinin yaradılması tapşırılmışdı. Sərəncamdan dərhal sonra Vətən Müharibəsi Memorial Kompleksinin və Zəfər muzeyinin layihələri hazırlandı və tikinti işlərinə başlanıldı.
Paytaxtın 8 Noyabr prospektində inşa olunan Zəfər parkının ərazisi 10 hektara yaxındır. Parkın girişində 44 günlük Vətən müharibəsinin rəmzi kimi hündürlüyü 44 metr, eni 22 metr, sütunlarının sayı 44 olan Zəfər tağı inşa edilib. Zəfər Parkında Azərbaycanın tarixi və mədəniyyətini, müharibənin dəhşətlərini və xalqın keçdiyi ağır yollari əks etdirən müxtəlif abidələr və ekspozisiyalar yerləşir. Burada Qarabağ müharibəsi ilə bağlı əhəmiyyətli məqamlar, həmçinin Azərbaycan tarixi və mədəniyyətinin izləri təqdim olunur. Park, yalnız fiziki məkan olmaqla qalmaz, həm də müxtəlif milli tədbirlərin, konsertlərin, sərgilərin və rəsmi mərasimlərin keçirildiyi bir yerdir. Burada hər il Qarabağ zəfərinin ildönümü qeyd olunacaq və bu da xalqın qələbə ruhunu canlı saxlayacaq.
Zəfər Parkı, gənc nəslin vətənpərvərlik hisslərini gücləndirmək və onların tarixi biliklərini artırmaq məqsədini güdür. Bu, gənclərin öz tarixləri və qəhrəmanları ilə qürur duymalarına şərait yaradır.
Zəfər Parkının açılışında Prezident İlham Əliyevin xalqa etdiyi müraciəti, Azərbaycanın 44 günlük Vətən Müharibəsində əldə etdiyi möhtəşəm qələbəni qeyd etməklə yanaşı, bu qələbənin Azərbaycanın müstəqilliyi, ərazi bütövlüyü və milli birliyi üçün nə qədər mühüm olduğunu vurğulayan dərin məna daşıyan bir çıxış idi. Prezidentin çıxışı, həm də ölkə əhalisini birlik və vətənpərvərlik ruhuna dəvət edən bir məqam idi: “Baxmayaraq ki, Ermənistanın arxasında duran bir çox dövlətlər bizim bu işğalla barışmağımız üçün müxtəlif üsullardan istifadə edirdilər. Azərbaycan xalqı yaxşı xatırlayır, böyük dövlətlər, bu məsələni – Ermənistan-Azərbaycan münaqişəsini guya həll etməyə çalışan vasitəçilər dəfələrlə bəyan edirdilər ki, bu münaqişənin hərbi həlli yoxdur. Onu demək istəyirdilər ki, biz bu işğalla barışaq. Onların planlarında məsələni həll etmək yox, işğala son qoymaq yox, Azərbaycan torpaqlarını erməni işğalının altında əbədi saxlamaq idi. Biz bunu görürdük, bilirdik. İllər keçdikcə, hər bir danışıqlar dövrü uğursuzluqla başa çatdıqca həm Azərbaycan rəhbərliyi, həm Azərbaycan xalqı bunu əyani şəkildə görürdü. Biz isə bu vəziyyətlə barışa bilməzdik. Hələ 2003-cü ildə ilk dəfə Azərbaycan Respublikasının Prezidenti vəzifəsinə seçiləndə mən bəyan etmişdim ki, nəyin bahasına olursa-olsun, biz öz ərazi bütövlüyümüzü bərpa edəcəyik, Azərbaycanın ərazi bütövlüyü, suverenliyi danışıqlar mövzusu olmayacaq və həyat bunu göstərdi”.
Zəfər Parkının açılışı ilə Prezident İlham Əliyev bir daha Azərbaycan xalqının və dövlətinin mübarizə əzmini və birlikdə qazandığı böyük zəfəri vurğuladı. O, bu parkın, həm də bir milli irsə çevriləcəyini və hər bir Azərbaycan vətəndaşının qələbə ruhunu yaşadacağı bir yer olacağını qeyd etdi. Park, həmçinin, şəhidlərimizin əziz xatirəsinə bir abidə olaraq, gələcək nəsillərə müharibənin və qələbənin nə qədər böyük bir əhəmiyyət kəsb etdiyini anlatmağı hədəfləyir.
Zəfər parkı yalnız fiziki məkan deyil, həm də bir simvol olaraq, Azərbaycanın tarixi zəfərini, müstəqillik uğrunda mübarizəni və ərazi bütövlüyü uğrunda xalqın verdiyi mücadiləni təmsil edir. Bu parkda, Azərbaycanın Qarabağ müharibəsindəki qələbəsini və bu mübarizədə şəhid olanların xatirəsini əziz tutan müxtəlif abidələr və memarlıq nümunələri mövcuddur. Zəfər Parkı Azərbaycanın müasir tarixinin simvolu olaraq, müharibə və sülh, qəhrəmanlıq və şəhidlərimiz haqqında xatirələrin yaşadığı bir məkana çevriləcək.
Paşa-zadə Kamal Çingiz oğlu
Qara Qarayev adına Mərkəzi İncəsənət Məktəbinin violonçel ixtisası üzrə müəllimi, Azərbaycan Respublikasının Əməkdar müəllimi
