Azərbaycanda elektroenergetika sahəsi ötən illər ərzində çox sürətli və sistemli inkişaf yolu keçib, enerji istehsalı, ötürülməsi və idarəetməsi istiqamətlərində mühüm nailiyyətlər əldə olunub. Mövcud elektrik stansiyaları əsaslı şəkildə yenidən qurulub, yüksək gərginlikli ötürmə xətləri və yarımstansiyalar istifadəyə verilib. Bu istiqamətdə görülən işlər elektroenergetika sahəsini ölkənin iqtisadi və enerji təhlükəsizliyinin əsas dayaqlarından birinə çevirib.
Bunu AZƏRTAC-a açıqlamasında Milli Məclisin Gənclər və idman komitəsinin sədri Şahin İsmayılov bildirib.
Azərbaycanın enerji siyasətində dayanıqlılıq, müasir texnologiyaların tətbiqi və ekoloji məsuliyyət prinsiplərinə əsaslanan kompleks yanaşma nümayiş etdirdiyini söyləyən komitə sədri qeyd edib ki, bu yanaşma ölkəmizin beynəlxalq enerji bazarlarında nüfuzunun gücləndirilməsində də mühüm rol oynayır.
“Azərbaycan Respublikasının Prezidenti cənab İlham Əliyevin təşəbbüsü ilə ölkəmizdə enerji sektorunda həyata keçirilən islahatlar və layihələr ölkəmizi bölgənin əsas enerji mərkəzinə çevirib. Cari il iyunun 24-də “8 Noyabr” Elektrik Stansiyasının rəsmi açılışı uğurlu enerji siyasətinin növbəti təzahürüdür. Mingəçevirdə yerləşən və ümumi gücü 1880 meqavat olan bu stansiya müstəqillik dövründə ölkəmizdə inşa edilən ən böyük elektrik istehsalı müəssisəsidir. 2023-cü ilin fevralında təməli qoyulan və qısa müddət ərzində istifadəyə verilən stansiya ekoloji və iqtisadi baxımdan da yüksək səmərəliliyə malikdir. Belə ki, şərti yanacaq sərfiyyatının azaldılması nəticəsində ildə 1 milyard kubmetr təbii qaza qənaət olunacaq, 2 milyon ton karbon qazının atmosferə atılmasının qarşısı alınacaq”, – deyə Şahin İsmayılov qeyd edib.
Bu layihənin beynəlxalq tərəfdaşlığın növbəti uğurlu nümunəsi olduğunu söyləyən komitə sədri bildirib ki, “8 Noyabr” stansiyası həm də Azərbaycanın ixrac potensialının genişlənməsi baxımından mühüm əhəmiyyətə malikdir. Dövlətimizin başçısının qeyd etdiyi kimi, bu gün ölkəmiz təbii qazı 12 ölkəyə ixrac edir. Bərpaolunan enerji layihələri sayəsində daxili tələbatın ödənilməsi üçün istifadə olunan qaza qənaət ediləcək.
“Dövlətimizin başçısı tərəfindən “yaşıl enerji” zonası elan olunan Qarabağ və Şərqi Zəngəzurda quruculuq işləri çərçivəsində, enerji infrastrukturunun yaradılmasına xüsusi diqqət göstərilir. Qısa müddət ərzində görülən işlər həm bölgənin iqtisadi inkişafına, həm də enerji təhlükəsizliyinə mühüm töhfə verir”, – Şahin İsmayılov bildirib.
Azərbaycanın bərpaolunan enerji potensialının inkişafında dünyanın qabaqcıl enerji şirkətlərinin də uğurla iştirak etdiyini söyləyən komitə sədri bildirib ki, COP29 kimi mötəbər tədbirə ev sahibliyi edən Azərbaycan yaşıl enerji sahəsinə xüsusi diqqət ayırdığını açıq şəkildə ifadə etdi. Bu gün icra olunan bərpaolunan enerji layihələri isə ölkəmizin bu sahədəki səmərəli fəaliyyətinin göstəricisi olmaqla yanaşı, enerji təhlükəsizliyi, ekoloji sabitlik və iqtisadi dayanıqlılıq baxımından strateji əhəmiyyət kəsb edir, Azərbaycanın enerji tarixində yeni bir mərhələnin əsasını qoyur.
