Gənc Mühasiblər İctimai Birliyi tərəfindən “Məsafədən iş formasında əmək funksiyasının yerinə yetirilməsinin hüquqi əsaslarının yaradılması” layihəsinin icrasına başlanıldı.
Belə ki, Layihənin məqsədi Əmək Məcəlləsində distant iş anlayışının tətbiqi ilə bağlı müddəaların əlavə edilməsidir.
Bu məqsədlə təkliflərin müvafiq qurumlara çatdırılması məqsədilə Dövlət, özəl və QHT sektorlarından nümayəndələrin iştirakı ilə Dəyirmi Masa keçirilməsi və distant iş rejiminin Əmək Məcəlləsində təbliği ilə bağlı videoçarxın hazırlanması nəzərdə tutulmuşdur. Son illərdə biznes, məşğulluq sahəsində baş verən dəyişikliklər öz növbəsində əmək qanunvericiliyinin də dəyişkən, sürətlə dəyişən mühitə uyğunlaşmalı olduğunu göstərir. Xüsusən, COVİD-19 pandemiyası məhz bu dəyişikliklərə diqqət edilməsinə təkan verdi. Məhz bu dövrdə işəgötürənlərin və işçilərin ehtiyacı dəyişərək yeni reallıqlar ortaya çıxdı, bu da öz növbəsində yeni iş modellərinin yaradılmasına səbəb oldu. İndi isə bu proseslər əsasında Əmək Məcəlləsinə yeni yanaşmaların, məşğulluq siyasətlərinin daxil edilməsinin vaxtıdır. Layihə çərçivəsində görüləcək işlər nəticəsində distant iş rejiminin Əmək Məcəlləsində təbliğinin müvafiq qurumlarla müzakirəsi və təkliflərin qəbuluna, xüsusən də işləyən qadınlara və uşaqları təkbaşına böyüdən analara dəstək göstəriləcəkdir.
